BQO-da 56 mln teńge bıýdjet qarjysyn jymqyrǵan merdigerler sottaldy
ORAL. KAZINFORM — Batys Qazaqstan oblysy Syrym aýdany Jympıty aýylyndaǵy joldardy kúrdeli jóndeýge bólingen bıýdjet qarajatyn jymqyrýǵa qatysty qylmystyq iske núkte qoıyldy.
BQO boıynsha ekonomıkalyq tergep-tekserý departamentinen málim etkenindeı, 2023 jyly 3 kósheni kúrdeli jóndeýge quny 259 mln teńgege jýyq memlekettik kelisimshart jasalǵan.
Merdiger retinde «Sapaq» óndiristik kooperatıvi qatysyp, keıinnen jumystardy oryndaý úshin «Aq-Bı» JShS qosalqy merdigerlik uıymyn tartqan.
Óz mindettemelerin adal oryndaýdyń ornyna, merdigerlik jáne qosalqy merdigerlik uıymdardyń basshylary aldyn ala sóz baılasý arqyly bıýdjet qarajatyn jymqyrý shemasyn uıymdastyrǵan.
Olar is júzinde oryndalǵan jóndeý jumystarynyń kólemi men qunyn asyra kórsetip, jalǵan aktiler rásimdegen. Osy qujattardyń negizinde tapsyrys berýshi memlekettik bıýdjetten tólem júrgizgen.
Qurylys jáne ekonomıkalyq saraptamalar málimdelgen jumystardyń edáýir bóligi múldem oryndalmaǵanyn nemese tek ishinara oryndalǵanyn rastady. Bul rette naqty oryndalǵan jumystardyń quny shamamen 127 mln teńge bolsa, oryndalmaǵany 56,5 mln teńgeden asyp ketken.
Zańsyz jolmen alynǵan aqshany shemaǵa qatysýshylar ózara bólisip alǵan: bir bóligi merdiger uıymnyń shottarynda qalyp, ekinshi bóligi qosalqy merdigerge aýdarylyp, maqsatsyz paıdalanylǵan.
Zańsyz áreketterdiń saldarynan memleketke 56,6 mln teńge kóleminde asa iri mólsherde zııan keltirildi.
- Sot «Sapaq» ÓK dırektory men «Aq-Bı» JShS dırektoryn qyzmettik baptaryn paıdalana otyryp, aldyn ala sóz baılasqan adamdar tobymen bıýdjet qarajatyn jymqyrǵany úshin kináli dep tapty. Olardyń árqaısysyna 8 jylǵa bas bostandyǵynan aıyrý jazasy taǵaıyndaldy. Sonymen qatar kommertsııalyq uıymdarda qarjylyq-sharýashylyq qyzmetpen jáne materıaldyq jaýapkershilikpen baılanysty laýazymdardy atqarý quqyǵynan 10 jyl merzimge aıyryldy, - dep habarlady vedomstvodan.
Budan buryn osy qylmystyq is boıynsha Syrym aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy laýazymdyq ókilettikterin teris paıdalanǵany úshin kináli dep tanylyp, 3 jyl 6 aıǵa bas bostandyǵyn shekteý jazasyna sottalǵan bolatyn.
Eske sala keteıik, budan buryn BQO-da memleketke 56 mln teńgeden astam zalal keltirgen memqyzmetshi sottalǵanyn jazǵan edik.
