BQO-da 500-ge jýyq kıikti atqandar sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń úkimimen kıik atýmen aınalysqan qylmystyq top sottaldy, dep habarlaıdy «QazAqparat» tilshisi.
Sot talqysynda belgili bolǵanyndaı, «Ohotzooprom» ÓB» RMQK qyzmetkeri Nurǵazy Sadyqov kıikti qorǵaýdyń ornyna qyzmet babyn paıdalanyp, top uıymdastyrǵan. Osylaısha, Qaztalov, Bókeı ordasy, Jánibek aýdandary men Atyraý oblysy aýmaǵynda atalmysh top 2016 jyldyń sáýirinen 2017 jyldyń maýsymyna deıin 500-ge jýyq kıiktiń kózin joıǵan. Sóıtip memleketke 745 mln teńge zalal keltirgen olarǵa barlyǵy 11 epızod boıynsha aıyp taǵyldy.
N.Sadyqov QR QK 262-baby 3-bóligine (uıymdasqan qylmystyq top qurý jáne oǵan qatysý), 337-baby 5-bóligine (qarda júretin tehnıkany qoldana otyryp, qylmystyq toppen asa iri kólemde zańsyz ań aýlaý), 339-babyna (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) jáne 287-baby 3-bóligine sáıkes (zańsyz qarý saqtaý) aıypty dep tanylyp, múlkin tárkileýmen birge 8 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge sottaldy.
QR QK 262-baby, 2-bóligi, 337-baby, 5-bóligi, 339-baby, 287-baby 3-bóligimen aıyptalǵan top músheleri Mahambet Aıshev 7 jylǵa, Álisher Janǵabaev pen Aslan Taıǵarenov 6 jáne Edil Qadyrov 5 jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesinde óteýge sottaldy.
Uıymdasqan qylmystyq topqa qatysy dáleldenbegendikten, Nurjan Dúısenǵalıev sot zalynan bosatyldy. Áıtse de QR QK 339-babyna sáıkes onyń eki jylǵa bas bostandyǵy shekteldi.
Sot úkimi zańdy kúshine engen joq.
Eske sala keteıik, ótken jyly 19 maýsym kúni Qaztalov aýdanynda kıik aýlaýmen aınalysqan uıymdasqan top músheleri qolǵa túskenin jazǵan bolatynbyz.
