BQO-da 50 mln teńgeni jymqyrǵan sport mektebiniń esepshisi 7 jylǵa sottaldy

ORAL. KAZINFORM – BQO ákimdigi dene shynyqtyrý jəne sport basqarmasynyń «Ulttyq sport túrleri boıynsha oblystyq balalar-jasóspirimder sport mektebi» MKQK-nyń bas esepshisi Anargúl Jumasheva QR QK 189-baby 4-bóligi 2)-tarmaǵyna sáıkes aıypty dep tanylyp, 7 jyl merzimge bas bostandyǵynan aıyrý jazasyna kesildi. 

Oral qalalyq sotynan túsken málimetke qaraǵanda, A.Jumashevaǵa jazasyn qaýipsizdigi ortasha qylmystyq-atqarý júıesi mekemesinde óteý belgilenip, ol sondaı-aq 10 jyl merzimge memlekettik mekemelerde, kvazımemlekettik sektor sýbektilerinde qarjylyq jəne materıaldyq jaýapkershilikpen baılanysty laýazymdardy atqarý quqyǵynan aıyryldy. 

Sot talqysynda málim bolǵanyndaı, A.Jumasheva 2018 jyldan bastap bas esepshi qyzmetin atqarǵan. Mekeme dırektory jalaqy məselesine baılanysty aýdarymdardy keshiktirmeı aýdarý úshin, sonymen qatar bos ýaqyty bolmaýyna jəne aýyldyq okrýgter men oblys ortalyqtaryna jıi issaparǵa barýyna baılanysty óziniń atyna tirkelgen «E-Token» qurylǵysyn jəne «Authenticator» mobıldik qosymshasyn A.Jumashevaǵa senip, paıdalanýǵa bergen. 

Úkimde kórsetilgenindeı, bas esepshi 2018 jyldyń qarasha aıynda óziniń materıaldyq jaǵdaıyn kóterý maqsatynda, qyzmet babyn paıdalana otyryp, asa iri mólsherde senip tapsyrylǵan bóten múlikti talan-tarajǵa salý jəne ıemdenip alýdy kózdegen. Sol úshin mekemede qyzmet atqarmaıtyn týystary, ıaǵnı anasy, aǵalary, jeńgesi, kúıeý balasy, sińlisiniń tanys qurbysynyń esep shottaryn óziniń qylmystyq is-əreketterinen habardar etpeı, olardyń attaryndaǵy banktik kartochkalaryn paıdalaný úshin ər túrli syltaýmen surap alǵan. Sodan keıin 2018 jyldyń qarashasynan 2023 jyldyń mamyryna deıin atalǵan adamdardy tólem tapsyrmasyna tirkeletin tizimge zańsyz qosyp, mekeme dırektorynyń atyna tirkelgen «E-Token» qurylǵysy jəne «Authenticator» mobıldik qosymshasy arqyly túsetin kodty paıdalanyp, olardyń jeke kartochkalyq shottaryna 23 297 594 teńgeni aýdarǵan. Sosyn sol qarajatty bankomattar arqyly jymqyryp, óz qajetine jumsaǵan. Osyndaı jolmen basqa da adamdardy paıdalanǵan. A.Jumashevanyń qylmystyq is-áreketteri saldarynan mekemeniń esepshotynan 49 mln 620,626 myń teńge jymqyrylyp, memleketke asa iri mólsherde zalal keltirilgen. 

Sot otyrysynda A.Jumasheva kinásin tolyq moıyndap, jasaǵan áreketine ókinetinin jetkizdi.

Sot sottalýshynyń eki jas balasy bolǵanymen, onyń jasaǵan qylmysynyń aýyrlyǵyn, asa iri mólsherdegi zalaldyń tolyq ótelmegenin, balalaryn azamattyq nekedegi kúıeýiniń asyrap, baǵyp-kútýge múmkindigi bar ekendigin eskerip, jazany keıinge qaldyrýǵa negiz joq dep tapty. 

A.Jumashevaǵa kelý týraly mindetteme túrindegi májbúrleý sharasy kúzetpen ustaýǵa ózgertilip, ol sot zalynda qamaýǵa alyndy.

Sottalýshy úkimmen kelispeı, apellıatsııalyq sot alqasyna júgindi.

Eske sala keteıik, budan buryn Oralda qaıtys bolǵan sýdıanyń uly sot arqyly 48 mln teńge óndirgenin jazǵan edik.