BQO-da 50 mln teńgege alaıaqtyq jasaǵan Almaty turǵyny 11 jylǵa sottaldy

ORAL. KAZINFORM — Batys Qazaqstan oblysynyń qylmystyq ister jónindegi mamandandyrylǵan aýdanaralyq sotynda Almaty qalasynyń turǵyny Eraly Baıqojaǵa qatysty úkim shyqty.

QR Sybaılas jemqorlyqqa qarsy is-qımyl agenttiginiń baspasóz qyzmetinen málim etkenindeı, E.Baıqoja Chapaev-Jańaqala-Saıqyn avtojolyn kúrdeli jóndeý jónindegi sharttyń jalpy somasynyń 30 paıyzy mólsherinde aldyn ala tólem jasaý úshin BQO ákimdiginiń laýazymdy qyzmetkerine dep kásipkerdi 50 mln teńge kóleminde para berýge ıtermelegen. 

- Sottalýshyǵa 11 jyl merzimge bas bostandyǵynan aıyrý jazasy kesildi. Sonymen qatar memlekettik qyzmette jáne kvazımemlekettik sektor sýbektilerinde laýazymǵa ornalasýǵa ómir boıyna tyıym salyndy. Sot úkimi zańdy kúshine engen joq, - dep habarlady vedomstvodan. 

Sot kabınetinen alynǵan málimetke qaraǵanda, qylmystyq is alqabılerdiń qatysýymen qaralǵan.

Sottalýshy 2024 jyldyń mamyr aıynda Chapaev-Jańaqala-Saıqyn jolyn (307-337 km) kúrdeli jóndeýge tender oınatylyp, «SMÝ-7» JShS jeńimpaz bolyp shyqqanyn bilgen. Osy múmkindikti paıdalanyp, E.Baıqoja seriktestik dırektoryna qońyraý shalyp, qosalqy merdiger bolýǵa kelisim-shart jasasyp, jumystyń bir bóligin berýdi suraǵan. Biraq merdiger budan bas tartqan. 27 maýsymda Astanada ózara kezdesýde E.Baıqoja óz usynysyn qaıtalap, maqsatyna jete almaǵan. 7 shildede atalmysh nysan boıynsha tolyq habardar bolǵan ol kelisim-shartta kórsetilgen 9 mlrd 465,3 mln astam teńgeniń 30 paıyzyn avans túrinde aýdartýǵa kómektesýge ýáde bergen. Jańadan taǵaıyndalǵan BQO ákiminiń orynbasarymen tanys ekendigin aıtyp, máseleni sol arqyly sheshýge bolatynyn, ol úshin 50 mln teńge para berý kerektigin aıtqan.

Munyń zańsyz ekendigin túsingen kásipker 8 shildede QR Sybaılas jemqorlyqqa qarsy is-qımyl agenttiginiń BQO boıynsha departamentine jazbalaı aryz bergen. 

Oralda 12 shilde kúni JShS dırektory E.Baıqojamen kezdesip, 50 mln teńge bergen. Onyń 49 mıllıony – jalǵan, 1 mıllıony shyn aqsha bolǵan. Sol kúni sottalýshy qolǵa túsip, ózine baılanysty emes mán-jaılar boıynsha qylmystyq is-áreketin aıaǵyna deıin jetkize almaǵan. 

Sot úkimimen E.Baıqoja QR QK 24-baby 3-bóligi 2-tarmaǵy, 190-baby 4-bóligi, 28-baby 4-bóligine sáıkes aıypty dep tanylyp, jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Eske sala keteıik, budan buryn Batys Qazaqstanda jol qurylysy nege kesheýildep otyrǵanyn jazǵan edik.