BQO-da 50 myńnan astam bastaýysh synyp oqýshysy ystyq tamaqpen qamtylǵan
ORAL. KAZINFORM — Batys Qazaqstan oblysynda memlekettik 365 mektepte oqýshylar úshin tamaqtaný uıymdastyrylǵan.
BQO bilim basqarmasy basshysynyń orynbasary Saıagúl Ǵalıevanyń óńirlik kommýnıkatsııalar qyzmeti alańynda ótken brıfıngte málim etkenindeı, QR Oqý-aǵartý mınıstrliginiń jáne QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń birlesken buıryǵyna sáıkes «Jalpy bilim beretin mektepterde jekelegen sanattaǵy bilim alýshylar men tárbıelenýshilerge tegin jáne jeńildikpen tamaq berý» memlekettik qyzmetin iske asyrý aıasynda aýdan ortalyqtary men qalalardaǵy 95 mektepte avtomattandyrylǵan baǵdarlamalyq-apparattyq keshen ornatylǵan. Bular «Áleýmettik ámııan» aqparattyq júıesimen ıntegratsııalanǵan.
Saıagúl Máýletqyzynyń sózine qaraǵanda, qalǵan 270 mektepte balama esep quraly retinde «Bıznes ámııan» qosymshasy qoldanylyp jatyr.
Atalǵan 95 mekteptegi jetkizýshilerdiń jumysy bylaısha bólingen.
- 23 mektep — «Otan-mektep»: Face ID qurylǵysy arqyly bıometrııalyq sáıkestendirý engizilgen;
- 11 mektep — «Alaqan»: alaqanmen sáıkestendirýge arnalǵan týrnıket termınaldary ornatylǵan;
- 6 mektep — «Qazbilim»: oqýshylarǵa arnalǵan sáıkestendirý kartalary qoldanylýda;
- 55 mektep — «E-Ashana»: oqýshylarǵa arnalǵan sáıkestendirý kartalary engizilgen.
— Bul baǵyttaǵy, ásirese, tsıfrlandyrý men ashyqtyqty qamtamasyz etý arqyly atqarylyp jatqan júıeli jumys oqý jaǵdaıyn jaqsartýǵa, shákirtter densaýlyǵyn saqtaýǵa jáne olardyń damý múmkindikteriniń teńdigin qamtamasyz etýge septigin tıgizedi. Tamaqtaný máziri oqýshylardyń jas erekshelikteri men aǵzanyń aqýyz, maı, kómirsý, dárýmender jáne mıneraldarǵa degen qajettiligine saı ázirlendi. Bıylǵy oqý jylyna bastap jańa mázirdi densaýlyq saqtaý basqarmasy bekitedi. Búgingi tańda 4 aptaǵa 4 túrli mázir daıyndalyp, barlyq mektepterge, odan ári mektep ashanasyn jalǵa alýshy mekemelerge jetkizildi. Kúni búgin oqýshylar jańa mázirmen tamaqtanyp otyr, — dedi Saıagúl Ǵalıeva.
Onyń aıtýynsha, 1-4 synypta bilim alatyn 50 359 oqýshy ystyq tamaqpen túgeldeı qamtylǵan.
Sonymen qatar áleýmettik qoldaý aıasynda 5 sanat boıynsha áleýmettik jaǵynan az qamtylǵan topqa jatatyn 5-11 synyptaǵy 6 102 oqýshy tegin ystyq tamaqpen qamtamasyz etildi.
Tegin tamaqpen qamtylmaǵan oqýshylar úshin mektepte aqyly býfettik tamaqtaný uıymdastyrylǵan. Býfet sanıtarııalyq talaptarǵa tolyq sáıkes keledi jáne kúni boıy jumys isteıdi. Onda ár bala qalaýy boıynsha paıdaly ári ár túrli taǵamdar men sýsyndardy satyp ala alady.
— Tamaq sapasy men qaýipsizdigin qamtamasyz etý maqsatynda tamaqtaný bloktarynyń sanıtarııalyq jaǵdaıy udaıy qadaǵalanady. Sondaı-aq ata-analar tarapynan baqylaý elementteri engizilgen. Ónim sapasy qoǵamdyq jáne ishki monıtorıng arqyly baqylanady. Dıetologtar men medıtsına mamandarynyń qatysýymen mázirler únemi jańartylyp otyrady, — dep qosty basqarma basshysynyń orynbasary.
Eske sala keteıik, budan buryn Oralda ashylýy tıis keleshek mektebi nege merziminde berilmeı qalǵanyn jazǵan edik.