BQO-da 50 gıdrotehnıkalyq qurylymnyń teń jartysy jóndeýdi qajet etedi
ORAL. KAZINFORM — Batys Qazaqstan oblysynda sýarmaly jer kólemi 12 441 gektarǵa deıin jetkizildi.
BQO ákiminiń orynbasary Tilepbergen Kaıýpovtyń oblystyq máslıhattyń kezekten tys 21-sessııasynda málim etkenindeı, ótken jyly bul kórsetkish 10 160 ga bolǵan edi.
Onyń sózine qaraǵanda, qazirgi kezde 11 712 ga alqapta nemese 94 paıyzynda sý únemdeý (jańbyrlatyp jáne tamshylatyp sýarý) tehnologııasy qoldanylady. Qalǵan 729 gektary aryq arqyly sýarylady.
— Kúni búgin oblysta 50 gıdrotehnıkalyq qurylymnyń 25-i jóndeýdi qajet etse, sonyń úsheýi — respýblıkalyq, 20-sy — kommýnaldyq, ekeýi — jeke nysandar. 2024 jyly 10 sý qoımasynda (tórteýi — respýblıkalyq, altaýy — kommýnaldyq menshikte) rekonstrýktsııalaý jáne aǵymdaǵy jóndeý jumystary júrgizildi. Qazirgi ýaqytta 14 sý qoımasyn rekonstrýktsııalaý úshin jobalyq-smetalyq qujattamalar daıyndalyp jatyr, — dedi T.Kaıýpov.
Onyń aıtýynsha, kóktemgi sý tasqynynyń aldyn alý maqsatynda 18 qorǵanys bógeti qalpyna keltirildi. Taǵy bir nysanda jumystar aıaqtalýda. Mundaı bógetterdiń jalpy uzyndyǵy — 37,1 km.
Eske sala keteıik, budan buryn BQO-da sýmen qamtamasyz etý baǵytynda birneshe joba qolǵa alynǵanyn jazǵan edik.
Sondaı-aq sý tasqynyna daıyndyq barysynda Batys Qazaqstanda birneshe ózenniń arnasy keńeıtildi.