BQO-da 5 jylǵa sottalǵan eks-sheneýnik raqymshylyqqa ilindi

ORAL. QazAqparat – Oral qalalyq sotynda BQO aýyl sharýashylyǵy basqarmasynyń burynǵy bólim basshysy, 29 jastaǵy Mıras Ánýarov pen 35 jastaǵy kásipker Talap Sultanǵalıevke qatysty úkim shyqty, dep habarlaıdy QazAqparat tilshisi.

BQO sotynyń baspasóz qyzmetinen túsken málimetke qaraǵanda, M.Ánýarov pen T.Sultanǵalıev QR QK 195-baby 4-bóligi 2)-tarmaǵyna sáıkes (aldaý nemese senimdi teris paıdalaný jolymen iri kólemde múliktik zııan keltirý) aıypty dep tanylyp, bes jyl merzimge bas bostandyqtarynan shekteldi.

«Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» Zańǵa sáıkes sottalýshylar jazadan bosatyldy.

Sotta anyqtalǵanyndaı, M.Ánýarov T.Sultanǵalıevpen 2019 jyly aldyn ala sóz baılasqan.

Atap aıtqanda, kún batareıalaryn satyp alý úshin sharýa qojalyqtarynyń basshylaryna sýbsıdııa alýǵa qujattar jasaýǵa járdem kórsetken. Bul rette sharýa qojalyqtarynyń basshylary eshteńeden kúdiktenbegen, tipti qajetti qujattar men ózderiniń elektrondyq-tsıfrlyq qoltańbalaryn tapsyrǵan. Al kásipker kún batareıalaryn Almaty bazarlarynan tómen baǵamen satyp alǵan.

Sottalýshylardyń zańǵa qaıshy áreketteri saldarynan memleketke 5,1 mln teńge kóleminde zalal keltirilgen.

Bul rette sottalǵandar sot úkimimen kelispeı, apellıatsııalyq shaǵym túsirdi.

Eske sala keteıik, budan buryn BQO-da tok soǵyp, eki qolynan aıyrylǵan balanyń oqıǵasyna úkim shyqqanyn jazǵan bolatynbyz.