BQO-da 5 jylda shekarany zańsyz kesip ótýge qatysty 143 qylmys tirkeldi
ASTANA. KAZINFORM – Batys Qazaqstan oblysynda oblys prokýrory Nurbek Ulasbekulynyń tóraǵalyǵymen «Shaǵan» ótkizý pýnktinde memlekettik shekaradaǵy zańdylyq pen qaýipsizdikti qamtamasyz etýdiń problemalaryna arnalǵan Úılestirý keńesiniń kezekti otyrysy ótti.
Keńeske oblys ákimi Narıman Tóreǵalıev, Shekara qyzmetiniń, ulttyq qaýipsizdik orgadarynyń, polıtsııa departamentiniń jáne ózge de múddeli memlekettik organdardyń basshylary qatysty.
Qatysýshylar ótkizý pýnktiniń qyzmetimen, ınfraqurylymynyń jaı-kúıimen jáne tehnıkalyq jaraqtandyrýymen tanysty, sondaı-aq ózekti máseleler men olardy sheshý joldaryn talqylady.
— Sońǵy 5 jylda memlekettik shekarasyn qasaqana zańsyz kesip ótýge baılanysty 143 qylmystyq quqyq buzý tirkeldi.
Sonymen qatar, zańsyz kóshi-qondy uıymdastyrýǵa baılanysty 35 qylmystyq quqyq buzý bolsa, 2 jylda shekara jáne kóshi-qon rejımin buzýǵa baılanysty 2 myńnan astam ákimshilik quqyq buzý tirkelgen.
Osy jyldyń ózinde zańsyz taýar ótkizýge baılanysty 500-ge jýyq áreketine tosqaýyl qoıyldy, — delingen Batys Qazaqstan oblysynyń prokýratýrasy habarlamasynda.
Shekaramen baılanysty barlyq problemalardy ózara birigip sheshýdiń 3 jylǵa arnalǵan tujyrymdamasy jasaqtaldy.
Qujat shekara qyzmetiniń ınjenerlik ınfraqurylymyn jańartý, qyzmetti tsıfrlandyrý, ótkizý pýnktterin damytý jáne tehnıkalyq jaraqtandyrý, kóshi-qon baqylaýyn jetildirý boıynsha naqty sharalardy kózdeıdi.
Aıta ketelik qyrkúıekte shekarashylar 4 myńnan astam zań buzýshyny ustady.
