BQO-da 5 myńnan astam adamǵa áleýmettik qyzmet kórsetilýde
ORAL. QazAqparat - Batys Qazaqstan oblysynda 5117 adamǵa áleýmettik qyzmet kórsetilýde. Bul týraly óńirlik kommýnıkatsııalar qyzmeti alańynda BQO jumyspen qamtýdy úılestirý jáne áleýmettik baǵdarlamalar basqarmasynyń basshysy Qalııar Aıtmuhambetov málim etti, dep habarlaıdy «QazAqparat» tilshisi.
Qalııar Shadııarulynyń aıtýynsha, onyń ishinde 1260 adam arnaıy áleýmettik qyzmet kórsetetin ortalyqtardyń qyzmetine júginedi. Atap aıtqanda, oblystaǵy 12 áleýmettik qyzmet kórsetý ortalyǵynda 188 qarııaǵa, 966 múgedek pen 136 múgedek balaǵa arnaıy áleýmettik qyzmet kórsetiledi. Óńirde barlyǵy 660 áleýmettik qyzmetker jumys jasaıdy.
Q.Aıtmuhambetov sonymen qatar QR Eńbek jáne halyqty áleýmettik qorǵaý mınıstrliginiń bastamasymen elordada 22 qyrkúıek kúni áleýmettik qyzmetkerlerdiń alǵashqy respýblıkalyq forýmy ótetinin jetkizdi. Oǵan Batys Qazaqstannan áleýmettik sala qyzmetkerleri men úkimettik emes uıymdar ókilderinen 28 delegat qatyspaq.
Forýmnyń basty maqsaty jańa oı-pikirlermen almasý úshin tıimdi qarym-qatynas alańyn qurý jáne áleýmettik jumys salasyndaǵy zamanaýı tásilder men jańa tehnologııalardy talqylaý bolyp tabylady. Forým eki bólimnen, jeke taqyryptardy tereń talqylaý, tájirıbe almasý, tıimdi sheshimder tabý, talqylanyp otyrǵan qyzmet kórsetý salasyn ary qaraı damytý boıynsha usynystardy qalyptastyrý men daıyndaý baǵytyndaǵy 8 sektsııalyq otyrystan turady. Onda QR Parlamenti men Úkimeti, QR Eńbek jáne halyqty áleýmettik qorǵaý mınıstrligi ókilderi men halyqaralyq sarapshylar qatysady. Forýmnyń sektsııalyq otyrystarynda múgedek adamdarmen, múgedek balalarmen jáne egde jastaǵy tulǵalarmen, turmystyq zorlyq-zombylyq jáne adam saýdasy qurbandarymen, bas bostandyǵynan aıyrý mekemelerindegi jáne jazasyn óteý oryndarynan bosatylǵan tulǵalarmen, belgili turaǵy joq tulǵalarmen jumys máselesi, densaýlyq saqtaý salasyndaǵy áleýmettik jumys, áleýmettik jumystaǵy menedjment, áleýmettik qyzmetkerlerdi oqytý jáne biliktilikterin arttyrý taqyryptary keńinen talqylanatyn bolady.
Sondaı-aq brıfıngte basqarma basshysy 2018-2021 jyldarǵa arnalǵan Áleýmettik qyzmet kórsetý júıesin jańǵyrtýdyń jańa tujyrymdamasy týraly áńgimeledi. Tujyrymdama áleýmettik salany jetildirýdiń buǵan deıingi 2010-2013, 2014-2017 jyldardy qamtyǵan eki kezeńiniń zańdy jalǵasy bolyp tabylady. 2018-2021 jyldardy qamtıtyn úshinshi kezeńde áleýmettik qyzmet kórsetýdiń qoljetimdiligin arttyrý maqsatynda qoldanystaǵy iri ınternattardyń (ortalyqtardyń) deınstıtýtsıonalızatsııalaýyn júrgizý josparlanyp, shaǵyn uıymdardyń jelisin keńeıtý, keıbir qyzmetterdi monetızatsııalaýdy engizý men júıeni aqparattyq qoldaýdy qamtamasyz etý kózdelgen.
