BQO-da 5 mln teńge kóleminde alıment tólemegen turǵyn sottaldy

ORAL. KAZINFORM — BQO kámeletke tolmaǵandardyń isteri jónindegi mamandandyrylǵan aýdanaralyq soty azamat S-ǵa qatysty QR QK 139-babyna qatysty qylmystyq iske núkte qoıdy.

BQO sotynan túsken málimetke qaraǵanda, sot buıryǵymen S-dan kámeletke tolmaǵan úsh balany asyrap-baǵý úshin olar kámeletke tolǵanǵa deıin aı saıyn tabystyń barlyq túrleriniń 2/1 bóligi mólsherinde alıment óndirilgen.

«Alaıda sottalýshy alımentti tóleýden jaltaryp, bereshekti óteý sharalaryn qoldaný úshin jumyspen qamtý bólimine jumysqa muqtaj adam retinde júginbegen jáne jumyssyz retinde tirkelmegen. Sonymen qatar ákimshilik jaýapkershilikke tartylǵanyna qaramastan, ol óz mindettemelerin oryndamaı, balalardy asyraýǵa alıment tóleýden jaltarýdy jalǵastyrǵan. Qazirgi tańda alıment boıynsha onyń bereshegi 5 mln 97,236 myń teńge boldy. Sot úkimimen S. QR QK 139-babyna sáıkes aıypty dep tanyldy. Kinásin moıyndap, jasaǵan isine ókingeni, jaýapkershilik pen jazany aýyrlatatyn mán-jaılardyń joqtyǵy eskerildi. S-ǵa jergilikti atqarýshy organdar aıqyndaıtyn oryndarda belgili bir shekteýler belgilenip, májbúrli eńbekke tartyla otyryp, 1 jyl bas bostandyǵyn shekteý túrindegi jaza taǵaıyndaldy», - dep habarlady vedomstvodan.

Eske sala keteıik, budan buryn BQO-da 50 mln teńge jymqyrǵan sport mektebiniń esepshisi 7 jylǵa sottalǵanyn jazǵan bolatynbyz.