BQO-da 5 balasy órtten kóz jumǵan otbasynyń aılyq tabysy belgili boldy

ASTANA. KAZINFORM – Eńbek jáne halyqty áleýmettik qorǵaý vıtse-mınıstri Vıktorııa Shegaı BQO-da bes balasy órtten kóz jumǵan otbasynyń aı saıynǵy tabysyn atap kórsetti.

— BQO-da 5 balasy órtten kóz jumǵan otbasyna qatysty aıtar bolsaq, bul otbasy kópbalaly otbasy retinde jáne 1,5 jasqa deıingi bala kútimine baılanysty járdemaqy alyp kelgen.

Jalpy alǵanda 134 myń teńge kóleminde járdemaqy alǵan, - dedi ol Úkimet otyrysynan keıingi baspasóz máslıhatynda. 

Sondaı-aq vıtse-mınıstr qazirgi tańda elimizde balasynan aıyrylǵan anaǵa tólem jasaý tetigi joǵyn atap ótti jáne japa shekken otbasynyń otaǵasy jumys istegenin aıtty. 

— Balalardyń ákesi jumys istegen, onyń jalaqysy shamamen 190 myń teńge bolǵan. Jalpy alǵanda bul otbasyndaǵy jan basyna shaqqandaǵy tabys kólemi 47 myń teńge bolǵan. Otbasy jergilikti atqarýshy organdarǵa kómek surap júginbegen, - dedi ol.

Eske salsaq, 4 maýsym kúni Batys Qazaqstanda órtten bir otbasynan bes bala kóz jumdy.

Oqıǵaǵa baılanysty qylmystyq is qozǵaldy.