BQO-da 5 100 qyz bala jatyr moıny obyryna qarsy egildi

ORAL. KAZINFORM – Qazaqstan Respýblıkasynyń 2024-2026 jyldarǵa arnalǵan ulttyq maqsattaryna sáıkes Batys Qazaqstan oblysynyń turǵyndary profılaktıkalyq ekpelermen qamtylyp keledi.

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń óńirlik kommýnıkatsııalar qyzmeti alańynda ótken brıfıngte málim etkenindeı, jyl basynan beri jatyr moıny obyrynyń aldyn alý maqsatynda adam papıllomasy vırýsyna qarsy vaktsınatsııalaý jumysy júrgizilip jatyr.

Dınara Oljabaıqyzynyń sózine qaraǵanda, qazirgi kezge deıin oblys boıynsha 11, 12 jáne 13 jastaǵy 5 100 qyz bala vaktsına aldy.

- Ata-analardan óz balalarynyń densaýlyǵyn qorǵaý úshin durys sheshim qabyldaýǵa shaqyramyz, - deıdi departament basshysy.

Onyń aıtýynsha, týberkýlezdiń aldyn alý úshin jańa týǵan nárestelerge BTsJ vaktsınasyn egý de mańyzdy. Bıylǵy alty aıda týberkýlezge shaldyqqan 110 adam tirkeldi, bul 100 myń turǵynǵa shaqqanda, 15,8-den keledi. Bul ótken jylǵydan (158) 1,4 esege az. Aýrýdyń asqynǵan túri baıqalǵan joq. Soǵan qaramastan, jylyna bir ret flıýorografııalyq tekserýden ótip, mantý synamasyn alyp, jeke gıgıena jáne salaýatty ómir saltyn saqtaý qajet.

- Bıylǵy birinshi jartyjyldyqta oblys aýmaǵynda oba, tyrysqaq, qutyrý, týlıaremııa, túıneme, sondaı-aq ish súzegi, dıfterııa, qyzamyq, sirespe, bezgek sııaqty qaýipti juqpaly aýrýlar tirkelgen joq. Ótken jyldyń osy kezeńimen salystyrǵanda, jiti ishek ınfektsııalary 30, joǵary tynys joldarynyń anyqtalmaǵan juqpasy 20,1 paıyzǵa, qyzylsha 54,21 esege, menıngokokk ınfektsııasy – 3, A vırýsty gepatıti – 6, kókjótel – 8, brýtsellez 16 derekke azaıdy, - dedi D.Jańabergenova.

Eske sala keteıik, budan buryn BQO-da búırek sındromdy gemorragııalyq qyzba aýrýyna shaldyqqandar sany kóbeıgenin jazǵan edik.