BQO-da 485 myńǵa jýyq sharshy metr turǵyn úı paıdalanýǵa berilmek

BQO qurylys basqarmasy basshysynyń mindetin atqarýshy Nurken Moldashevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 120,1 myń sharshy metr turǵyn úı memlekettik bıýdjet esebinen iske qosylmaqshy.

Atap aıtqanda, 8 kóppáterli turǵyn úı (1377 páter) jáne aýyldyq eldi mekenderde 93 turǵyn úı (233 páter) tapsyrylmaqshy. Sonyń ishinde turǵyn úı qurylys jınaq banki salymshylary úshin 6 kóppáterli úı (963 páter) men aýyldarda 20 turǵyn úı (120 páter), jergilikti atqarý organdarynda kezekte turǵandarǵa 2 kóppáterli úı (414 páter) men eldi mekenderde 73 turǵyn úı (113 páter) beriledi.

N.Moldashevtiń sózine qaraǵanda, bıyl 17 kóppáterli úı (2503 páter) men aýyldyq eldi mekenderde 139 úı (474 páter) qurylysy men 20 ınjenerlik kommýnıkatsııalar ınfraqurylymy nysanyna «Nurly jer» baǵdarlamasy aıasynda 21,1 mlrd teńge bólindi.

Turǵyn úı qurylysy 2021 jyly da jalǵasady. Mysaly, jalǵa beriletin turǵyn úı qurylysyna aldyn ala respýblıkalyq bıýdjet esebinen 2,7 mlrd teńge bólý qoldaý tapty. Atalǵan qarajatqa Oral men Aqsaı qalalarynda 2 kóppáterli turǵyn úı, Qaztalov, Jańaqala, Jánibek aýdandarynda 26 úıdiń qurylysyn aıaqtaý josparlanýda. Oǵan qosa aýyldarda 26 turǵyn úı qurylysy bastalmaqshy.

Aldaǵy jyly ınjenerlik kommýnıkatsııa tartýǵa 3,99 mlrd teńge berý de respýblıkalyq bıýdjet tarapynan qoldaý taýyp otyr. Buǵan Oral qalasy, Bórli, Tasqala, Bókeı ordasy, Jańaqala, Shyńǵyrlaý, Qaztalov, Aqjaıyq, Terekti aýdandarynda 23 jobany júzege asyrý kózdelýde. Sonyń ishinde 19 joba boıynsha turǵyn úı qurylysy úshin jer telimderine ınjenerlik jeliler tartylatyn bolady.

«Sondaı-aq kelesi jyly bıyldan aýysatyn 7 kóppáterli turǵyn úıdiń (onyń altaýy Oralda, bireýi Aqsaıda) jáne Terekti aýdany Toqpaı aýylynda 20 nesıelik úıdiń qurylysy márege jetpekshi», dedi N.Moldashev.

Eske sala keteıik, budan buryn oraldyq kásipkerdiń kópbalaly anaǵa páter kiltin tabys etkenin jazǵan bolatynbyz.