BQO-da 464 myń dana maskany Máskeýge áketip bara jatqan júrgizýshi ustaldy
ORAL. QazAqparat – Batys Qazaqstan oblysynda 464 myń dana maskany Máskeýge áketip bara jatqan júrgizýshi ustaldy, dep habarlaıdy QazAqparat tilshisi.
QR UQK Shekara qyzmeti departamentinen podpolkovnık Asqar Qazbekovtiń málim etkenindeı, oqıǵa 17 sáýir kúni «Syrym» ótkizý beketinde oryn aldy.
Shekarashylar Almatydan Máskeýge bet alǵan, qazaqstandyq azamat aıdap kele jatqan «VOLVO» avtokóligin teksergen kezde kýzovtyń durys plombalanbaǵanyn kórgen. Jóneltýshi mekeme «KazAltyn servıs» JShS ilespe qujat pen shot faktýrada júkti jalpy salmaǵy 12 920 kg halyq tutynatyn taýarlardyń 20 túri retinde kórsetken.
Arnaıy tehnıkalyq quraldarmen teksergende, shekarashylar túri men kólemi birdeı 119 qoraptyń qujatta kórsetilgenmen sáıkes kelmeıtinin ańǵardy. Qoraptardy ashqan kezde odan bir ret qoldanylatyn 464 myń dana medıtsınalyq maska shyqty. Onyń quny shamamen 55,932 mln teńgeni quraıdy.
Qazirgi kezde materıaldy BQO boıynsha ekonomıkalyq tergeý departamentine berý josparlanýda.
Eske sala keteıik, budan buryn 406 myń dana maskany Qazaqstannan Reseıge alyp bara jatqan júrgizýshiniń ustalǵanyn jazǵan bolatynbyz.
