BQO-da 46 mln teńge bıýdjet qarajatyn jymqyrǵan kitaphana býhgalterleri sottaldy

ORAL. KAZINFORM — Terekti aýdandyq sotynda Terekti aýdany ortalyqtandyrylǵan kitaphana júıesiniń bas býhgalteri Natalıa Mýstıvko men býhgalteri Irına Jýravskaıaǵa qatysty úkim shyqty.

Sot talqysynda belgili bolǵanyndaı, N.Mýstıvko esep ústeliniń býhgalteri I.Jýravskaıamen aldyn ala sóz baılasyp, 2023-2025 jyldary jalaqy tóleýge arnalǵan qarjyny jymqyrǵan.

Sottalýshylar kitaphana dırektorynyń elektrondy tsıfrlyq qolyn paıdalana otyryp, SWIFT-qujatyn rásimdeý arqyly qarjyny ózderiniń esepshotyna aýdaryp otyrǵan.

Osylaısha, olar Terekti aýdany ortalyqtandyrylǵan kitaphana júıesine barlyǵy 45 mln 989,905 myń teńge materıaldyq zalal keltirgen.

Sot otyrysynda N.Mýstıvko men I.Jýravskaıa kinásin tolyq moıyndap, qylmystyq is-áreketke qarjy qıyndyqtary men densaýlyqtaryndaǵy kináratqa baılanysty barǵandaryn aıtty.

Sot úkim shyǵarǵan kezde sottalýshylardyń erikti túrde shyǵynnyń ornyn toltyrǵanyn, jazany jeńildetetin mán-jaılardy eskerdi.

Sottalýshylar QR QK 189-baby 4-tarmaǵy 2-tarmaqshasyna (asa iri kólemde senip tapsyrylǵan bóten múlikti ıemdenip alý nemese talan-tarajǵa salý) sáıkes 7 jylǵa bas bostandyǵynan aıyrýǵa kesilgenimen, 63-bap negizinde jaza shartty dep tanyldy.

Sonymen qatar olar 8 jyl merzimge menshik túrine qaramastan, barlyq uıymdarda materıaldyq jaýapkershilikke qatysty jáne býhgalterlik qyzmetpen aınalysý quqyǵynan aıyryldy.

Sot úkimi zańdy kúshine engen joq.

Eske sala keteıik, budan buryn BQO-da memleketke 56 mln teńgeden astam zalal keltirgen memqyzmetshi sottalǵanyn jazǵan bolatynbyz.