BQO-da 448 adamnyń kólikti mas kúıinde júrgizgeni anyqtaldy
ORAL. QazAqparat - Batys Qazaqstan oblysynda jyl basynan beri 448 adamnyń kólikti mas kúıinde júrgizgeni anyqtaldy, dep habarlaıdy QazAqparat tilshisi.
Oral qalalyq ishki ister basqarmasy jergilikti polıtsııa qyzmetiniń aǵa ınspektory, polıtsııa maıory Dınara Ábdilqalyqovanyń aıtýynsha, óńirde jol qozǵalysy qaýipsizdigin qamtamasyz etý baǵytynda uıymdastyrylǵan aılyq aıasynda «Mas júrgizýshi» jedel aldyn alý sharasy da ótkizildi.
Onyń sózine qaraǵanda, eger júrgizýshi kólik rýline mas kúıinde otyrsa, sot sheshimimen úsh jylǵa deıin kólik basqarý quqyǵynan aıyrylady. Eger júrgizý quqyǵynan aıyrylǵan júrgizýshi jyl ishinde rýlge qaıta otyrsa, ony keminde 15 táýlikke ákimshilik qamaýǵa alý jazasy kútip tur.
Qazirgi kezde mundaı jazaǵa ilikkender joq emes. Solardyń biri, on táýlikten astam ýaqyt boıy ýaqytsha oqshaýlaý ızolıatorynda otyrǵan Azat esimdi júrgizýshi óziniń jasaǵan isine shyn ókinetinin bildirdi.
«Eger mas kúıimde rýlge otyrǵanym úshin qamaýǵa alynatynymdy bilsem, ishimdikke múlde jolamas edim. Endi jumysqa qaıtyp kórinemin, birinshi synyptaǵy balamnyń kózine qalaı qaraımyn!? «Mas kúıińde jol apatyn jasaǵansha, qamalǵanyń jaqsy bolǵan», dep áıelim durys aıtqan eken. Bul maǵan ómirlik sabaq boldy», dedi ol.
Aıta keteıik, oblysta 30 mamyr - 1 maýsym aralyǵynda «Qaýipsiz jol» jedel aldyn alý sharasy da ótkizildi. Úsh kúnniń ishinde 1 830 jol erejesin buzýshylyq anyqtalsa, sonyń ishinde 41 júrgizýshiniń kólikke mas kúıinde otyrǵany belgili boldy. 15 júrgizýshi kóligimen qarsy betke shyǵyp ketse, jyldamdyqty shekten tys arttyrǵandarǵa 285 ákimshilik hattama toltyryldy. 57 júrgizýshi baǵdarshamnyń tyıym salǵan belgisine qaramastan ótse, júrgizýshi kýáligi joq 32 adam rýlge otyrǵan. Sot sheshimimen kólik basqarý quqyǵynan aıyrylǵan 8 adam avtokólik aıdap, ustaldy. Sondaı-aq jol erejesin buzǵan 202 jaıaý júrginshi de «kózge tústi».
