BQO-da 430 myń saılaýshyǵa shaqyrtý jetkizý bastaldy
ORAL. QazAqparat - Batys Qazaqstan oblysynda tizimge engizilgen 430 875 saılaýshyǵa shaqyrý úlestirile bastady. Bul týraly oblystyq saılaý komıssııasynyń tóraǵasy Ǵaısa Qapaqov málim etti.
Onyń aıtýynsha, jergilikti ákimdikter saılaý komıssııalaryna tapsyrǵan tizim boıynsha eriktiler saılaýshylarǵa shaqyrýdy jetkizýmen birge olardyń sol mekenjaıda bar-joǵyn anyqtaıdy. Degenmen bul jerde turǵyndardyń ózderi belsendilik tanytyp, aty-jónderiniń tizimde bar-joǵyn kún ilgeri bilgeni jón. Óńirde barlyǵy 520 saılaý ýchaskesi bolsa, olardyń barlyǵy da naýqandy ótkizýge daıyn.
Eger 20 naýryz - daýys beretin kúni saılaýshy óziniń aty-jónin tizimnen tappaǵan jaǵdaıda onda ár ýchaskede jumys jasaıtyn halyqqa qyzmet kórsetý ortalyǵy qyzmetkerleriniń kómegine júgine alady, sóıtip mekenjaıy boıynsha tizimge tirkele alady. Saılaýshy basqa jaqqa ketken jaǵdaıda daýys berýge qatysý úshin esepten shyǵarý talonyn ala alady. Esepten shyǵarý talondary 4 naýryzdan 19 naýryz kúngi saǵat 18.00-ge deıin beriledi.
Halyq sanyn esepteı otyryp, saılaý ýchaskelerinde kezekti kóbeıtpeý úshin qosymsha 21 saılaý ýchaskesi ashylsa, sonyń 17-si Oral qalasynda, qalǵan tórteýi aýdandarda. Shalǵaı eldi mekender turǵyndary úshin ýchaskelerge tasıtyn kólikter uıymdastyrylady. Barlyq saılaý ýchaskeleri tehnıka jáne órt qaýipsizdigi jaǵynan tekserildi. Daýys berý 20 naýryz kúni saǵat 07.00-de bastalyp, keshki 20.00-de aıaqtalady. Eń bastysy, Májilis jáne máslıhat depýtattaryn saılaýdy uıymshyldyqpen ótkizip, oǵan saılaýshylar belsendi qatysyp, óz tańdaýlaryn jasaǵany abzal.
Eske sala keteıik, ótken jylǵy Prezıdent saılaýynda óńirde 404 myń saılaýshy tirkelgen bolatyn.
