BQO-da 42 laýazymdy qyzmetkerge 3,3 mln teńge ákimshilik aıyppul salyndy
ORAL. KAZINFORM — Batys Qazaqstan oblysynda memlekettik qyzmetterdiń sapasyn baqylaý maqsatynda QR Memlekettik qyzmet isteri agenttiginiń BQO boıynsha departamenti júrgizgen is-sharalar nátıjesinde 28 658 zań buzýshylyq anyqtaldy.
Departament basshysy, ádep jónindegi keńestiń tóraǵasy Murat Baısalovtyń óńirlik kommýnıkatsııalar qyzmeti alańynda ótken brıfıngte málim etkenindeı, zań buzýshylyqtyń 14 643-i nemese 57,1 paıyzy densaýlyq saqtaý, 5 979-y (23,3 paıyzy) aýyl sharýashylyǵy, 4 997-si (8,3 paıyzy) sáýlet jáne qurylys, 1 290-y (5 paıyzy) turǵyn úı-kommýnaldyq sharýashylyq, 827-si (2,5 paıyzy) jer qatynastary, 422-si (1,6 paıyzy) kólik jáne kommýnıkatsııa, 500-i (1,9 paıyzy) ózge salalardyń úlesine tıedi.
Onyń sózine qaraǵanda, 57 baqylaý is-sharasyn júrgizý barysynda 9 747 buzýshylyq anyqtalǵan. Munyń kópshiligi nemese 6 520-sy (66,9 paıyzy) memlekettik qyzmetter kórsetý tártibin saqtamaýshylyq bolyp otyr.
- Sonymen qatar syrtqy monıtorıngpen 18 911 buzýshylyq belgili bolsa, osynyń 13 232-si – negizsiz bas tartý, 1 908-i – qujat toptamasy tolyq bolmaǵan jaǵdaıda qyzmet kórsetý, 1 583-i – merzimin buzý, 1 710-y – ózge buzýshylyqtar. Bularǵa jol bergen kináli 36 adam tártiptik jaýapkershilikke tartyldy. QR Ákimshilik quqyq buzýshylyq týraly kodekstiń 465-babyna (ruqsat berýdiń tártibin jáne merzimin buzý) sáıkes 64 hattama toltyrylyp, 42 laýazymdy qyzmetkerge 3,3 mln teńge ákimshilik aıyppul salyndy, - dedi departament basshysy.
Onyń aıtýynsha, jyl basynan beri ádep jónindegi keńestiń 10 otyrysy ótkizilip, 59 másele (munyń 42-si nemese 71 paıyzy profılaktıkalyq baǵytta) qaralǵan.
- Ádep jónindegi keńes usynymyna sáıkes 16 laýazymdy qyzmetkerge tártiptik jaza qoldanyldy. Sonyń ishinde Ádep kodesiniń talaptaryn saqtamaǵan 1 adam eskertý, ekeýi sógis, úsheýi qatań sógis, tórteýi qyzmetine tolyq sáıkes emestigi týraly eskertý aldy. Memlekettik qyzmetke kir keltiretin teris qylyq jasaǵany úshin 5 qyzmetkerge qyzmetine tolyq sáıkes emestigi týraly eskertý berilse, bireýi jumysynan bosatyldy, - dep qosty M.Baısalov.
Eske sala keteıik, budan buryn BQO-da sot uıǵarymyn oryndamaǵan aýyl ákimine shara qoldanylǵanyn jazǵan edik.