BQO-da 42 qylmysqa qatysy bar uıymdasqan top ustaldy
ORAL. QazAqparat - Batys Qazaqstan oblysynda akkýmýlıator urlaýmen aınalysqan uıymdasqan top ustaldy, dep habarlaıdy «QazAqparat» tilshisi.
BQO ІІD jergilikti polıtsııa qyzmetinen túsken málimetke qaraǵanda, «Kvadrat» aldyn alý sharasyn júrgizý barysynda 20 sáýir kúni Podstepnyı aýylynda ýchaskelik polıtsııa ınspektorlary Sovet kóshesinde turǵan «Aýdı-80» avtokóligin baıqaıdy. Saqshylardy kórgen boıda avtokólikte otyrǵandar Oral qalasyna qaraı qashpaq bolǵanymen, kóp uzamaı ustaldy. Tekserý kezinde avtokóliktiń júksalǵyshynan eki úlken «Barys» akkýmýlıatory tabyldy.
Ustalǵandardyń úsheýi de aýdandyq ishki ister bólimine jetkizilip, kóp uzamaı olardyń Terekti aýdany aýmaǵynda ǵana emes, Oral qalasynda da uzaq ýaqyt boıy akkýmýlıator urlaýdy kásip qylǵany belgili boldy. Kúni búgin atalǵan toptyń 42 qylmysqa qatysy bary anyqtaldy. Olardyń bári de - 20-25 jas aralyǵyndaǵy jastar. Qazirgi kezde ekeýi qamaýǵa alynyp, bireýi kepilge bosatylyp, tergeý amaldary júrgizilýde.
