BQO-da 40-tan astam adamnyń AITV ınfektsııasyn juqtyrǵany tirkeldi

Oblystyq AITV ınfektsııasynyń aldyn alý ortalyǵynyń dırektory Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, atalmysh ınfektsııa derekteriniń azaıýy turǵyndar arasynda profılaktıkalyq jumystardyń kúsheıe túsýi aıasynda baıqalady. Sonymen qatar barlyq azamattyń jylyna keminde bir ret AITV ınfektsııasyna tekserýden ótýi mańyzdy. 

Nurlybek Ermekulynyń sózine qaraǵanda, ýaqytyly testileý ınfektsııany erte satyda anyqtap, emdi der kezinde bastaýǵa múmkindik beredi. 

— Aýmaqtyq bóliniste oblys ortalyǵy negizgi taralý oshaǵy bolyp qalyp otyr. Infektsııa juqtyrǵandardyń 29-y nemese úshten ekisi (66 paıyzy) Oral qalasynyń úlesine tıedi. Sondaı-aq Bórli aýdanynda 5, Báıterekte 4, Tasqala men Terektide eki-ekiden, Syrym men Bókeı ordasynda bir-birden derek tirkeldi, — deıdi N.Mustaev. 

Onyń aıtýynsha, alǵash ret anyqtalǵan patsıentter qurylymyna jasalǵan taldaý ınfektsııanyń osal toptar sheginen shyǵyp, halyqtyń barlyq toptaryn, negizinen eńbekke qabiletti jáne ekonomıkalyq belsendi jastaǵy adamdardy qamtıtynyn kórsetedi. Sonyń ishinde 28-i nemese 63,6 paıyzy — erler, 16-sy nemese 36,4 paıyzy — áıelder. 

Patsıentterdiń 39 paıyzy 40-49, 29,5 paıyzy — 30-39, 11,4 paıyzy — 20-29, 7 paıyzy — 50-59 jastaǵylar, 9,1 paıyzy — 60-tan asqandar. jastaǵylar. 

Infektsııanyń 73 paıyzy jynystyq, 25 paıyzy ınektsııalyq esirtkini qoldanýmen baılanysty parenteraldy jolmen juqqan. Tik berilý joly (retrospektıvti) — 2 paıyz: epıdemıologııalyq zerttep-tekserý barysynda ótken kezeńderge jatatyn balanyń ınfektsııany juqtyrýynyń bir faktisi anyqtaldy.

— Oblysta tik (anadan balaǵa) berilý jolyna qatań jáne úzdiksiz baqylaý qamtamasyz etilýde. Jyl basynan beri AITV-men ómir súretin 9 júkti áıel medıtsınalyq baqylaýda boldy. Olardyń barlyǵy deni saý balalardy dúnıege ákeldi, — dep qosty N.Mustaev.

Eske sala keteıik, budan buryn BQO-da AITV ınfektsııasyn juqtyrǵandardyń basym bóligi Oralda tirkelip otyrǵanyn jazǵan edik.