BQO-da 40 myńnan astam turǵyn Elbasy Joldaýyn tikeleı efırden qarady
Oral qalasynda mundaı is-shara birneshe jerde uıymdastyrylyp, sonyń ishinde Dostyq úıine aýdan ákiminiń orynbasarlary, saılaý komıssııalarynyń tóraǵalary, jastar qoǵamdyq birlestikteri, Qazaqastan halqy Assambleıasynyń Batys Qazaqstan oblysyndaǵy qurylymdyq bólimsheleri, qalalyq jáne aýdandyq qoǵamdyq kelisim keńesteri, memlekettik mekemeler basshylary men qyzmetkerleri, barlyǵy 150-deı adam jınaldy.
Osy jıynǵa qatysqan Jańaqala aýdandyq máslıhatynyń hatshysy, aýdandyq qoǵamdyq kelisim keńesiniń tóraǵasy Zakarııa Sısenǵalıdiń aıtýynsha, Elbasy búgingi Joldaýynda Táýelsizdik alǵan jyldardan bergi tabys-jetistikterǵa toqtala otyryp, barlyq sala boıynsha alda turǵan maqsat-mindetterdi atap kórsetti.
«Sonyń ishinde aýyldyq jerdi órkendetý, aýyl ekonomıkasyn kóterý máselesi, sondaı-aq bilim, mádenıet, densaýlyq saqtaý salalarynda úlken ózgerister bolatyny, soǵan sáıkes qomaqty qarjy bólinetini aıtyldy. Osyǵan oraı atqarýshy jáne ókildi bılik oryndaryna naqty tapsyrmalar berildi. El ishinde tártipti kúsheıtý, memlekettik qyzmet tıimdiligin kóterý úshin qanatqaqty jobalardy jalǵastyrý qajettigi atap ótildi. Elbasy Joldaýy barsha qazaqstandyqtarǵa tyń serpin beredi. Ásirese, aldaǵy jyldy Jastar jyly dep jarııalaýy óte oryndy boldy dep oılaımyz. Óıtkeni el bolashaǵy - jastar. Olarǵa senim arta otyryp, eńbek etýine jaǵdaı jasaı bilýimiz qajet. Endigi mindet - osy Joldaýda aıtylǵan mindetterdi oryndaýǵa el bolyp jumyla bilý», - dedi Z.Sısenǵalı.
Aıta keteıik, oblystyq ishki saıasat basqarmasynan túsken málimetke qaraǵanda, óńirde 40 myńnan astam adam Elbasy Joldaýyn tikeleı efırden qarady.
