BQO-da 40 myńdaı jumysshy jas eńbek etedi
ORAL. QazAqparat - Batys Qazaqstan oblysynda 145 myńǵa jýyq jas bolsa, sonyń 40 myńdaıy - jumysshy. Bul týraly óńir jumysshy jastarynyń «Oral transformator zaýyty» JShS-da ótken forýmynda BQO jastar saıasaty máseleleri basqarmasynyń basshysy Aıan Sakoshev málim etti, dep habarlaıdy QazAqparat.
Onyń aıtýynsha, osyndaı jıyndarda jastar kókeıkesti máselelerdi talqylap, tájirıbe almasady, oı-pikir, usynystarymen bólisedi. Elimizde jastardyń jumysshy mamandyqtaryn meńgerýine basa kóńil bólinýde. Osy oraıda kásibı bilim beretin oqý oryndary men jumys berýshiler ózara tıimdi baılanysty jolǵa qoısa, qajetti mamandyqty ıgergen túlekter jumyssyz qalmaıdy.
Jastardyń óndiriske jıi aralasyp otyrǵandyǵynyń jarqyn mysalyn osy «Oral transformator zaýytynan» kórýge bolady. Elbasy men memlekettiń qoldaýymen Indýstrııalandyrý kartasy aıasynda ashylǵan óndiris orny jylyna 10 myń dana úsh fazaly qýatty transformator shyǵaryp, ony TMD elderine jónelte alady. Atalmysh joba quny 3,1 mlrd. teńge bolsa, «Bıznestiń jol kartasy - 2020» baǵdarlamasyna sáıkes 2,6 mlrd. teńge nesıeniń paıyzdyq mólsherlemesin demeýqarjylandyrýǵa qarjy bólindi. Sonyń nátıjesinde 300 jumys orny ashyldy. Qazirgi tańda zaýytta 208 qyzmetker eńbek etse, sonyń 90 paıyzy - jastar.
Forýmǵa qatysýshylar «Oral transformator zaýytynyń» tynys-tirshiligimen tanysyp, jas jumysshylarymen tildesti. «Oral transformator zaýyty» JShS óndiris jónindegi dırektory Nurjan Abdýllaev, oraýshy mamany Hadısha Ábdıeva jáne basqalar transformator syndy ónimderdiń qalaı shyǵarylatyndyǵyn baıandap berdi.
Óńirdegi tájirıbeli óndiris basshylarynyń biri, «Batys Qazaqstan qurylys materıaldary korporatsııasy» AQ bas dırektory Muhametjan Kenjeǵulovtyń pikirinshe, jastardyń jumysshy mamandyqtaryna bet burýy úshin zaman aǵymyna saı qalyptasyp ketken kózqarasty ózgertpeı bolmaıdy. Kúni búgin, ásirese, qazaq jastary qazirgi tańda asa qajetti mamandyqtardy elemeı, bári birdeı joǵary bilim alyp, kópshiligi qarjyger, zańger, aýdarmashy t.b. bolǵysy keledi. Sonyń saldarynan qaltasynda kúrekteı dıplomy bolǵanymen, jumyssyz qalady nemese mamandyǵyn ózgertýge májbúr. Sonymen qatar qajetti kadr daıarlaýǵa kásiporyndardyń ózderi múddeli bolýy kerek. Aıtalyq, 500-deı adam jumys jasasa, sonyń 23 paıyzyn jastar quraıtyn atalmysh kooperatsııa kolledjderde joq keıbir mamandyqtardy ózi oqytady, sondaı-aq bilimderin jetildirýge múmkindik jasaıdy.
