BQO-da 40 myńdaı turǵynǵa kommýnaldyq jeńildik kórsetiledi

ORAL. QazAqparat – Batys Qazaqstan oblysynda 40 myńdaı turǵynǵa kommýnaldyq jeńildik kórsetiledi, dep habarlaıdy QazAqparat tilshisi.

Oblys ákimi Ǵalı Esqalıevtiń málim etkenindeı, Memleket basshysynyń tapsyrmasyna sáıkes tótenshe jaǵdaı men karantın ýaqytynda jeńildik alatyn sanattarǵa jatatyn, kommýnaldyq qyzmet jetkizýshilermen kelisimsharty bar tutynýshylar úshin aıyna 15 myń teńge tóleý qarastyrylǵan bolatyn.

«Sońǵy kezde osy jeńildikke qatysty saýal jıi túsýde. Kommýnaldyq tólem úshin 15 myń teńge turǵyndardyń emes, kommýnaldyq mekemelerdiń shotyna aýdarylady. Mysaly, sáýir aıy úshin túbirtek 10 mamyrǵa deıin keledi. Soǵan deıin kommýnaldyq tólem tólenedi. Oblysta jeńildik alatyn sanattarǵa jatatyn 39-40 myńdaı turǵyn bar», dedi óńir basshysy.

Oral qalasy ákimdiginen túsken málimetke qaraǵanda, atalǵan jeńildikti І, ІІ, ІІІ top múgedekteri, múgedek balalardy tárbıelep otyrǵan otbasylar, kópbalaly otbasylar, Ekinshi dúnıejúzilik soǵystyń múgedekteri men qatysýshylary jáne oǵan teńestirilgen tulǵalar paıdalana alady.

Sondaı-aq memlekettik nemese qoǵamdyq mindetterin, áskerı qyzmetin oryndaý, ǵarysh keńistigine ushýǵa daıyndyq nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary, tómen jáne odan az zeınetaqy alatyndar, ataýly áleýmettik kómek alatyn azamattar, sonyń ishinde jalǵyzbasty zeınetkerler ótinim bere alady.

Tólemdi alý úshin tutynýshy aqparattyq júıeler (elektrondy poshta: [e-mail]) nemese call-ortalyq (109, 500-255, 8-771-068-58-53, 8-771-068-58-63) arqyly jeke sáıkestendirý nómirin, áleýmettik dárejesin kórsete otyryp, ákimdikke ótinim berýi kerek.

Ákimdik usynylǵan derekterdi tekserip, málimetter ras bolǵan jaǵdaıda tólemaqy aýdarylady.

Eske sala keteıik, budan buryn Batys Qazaqstanda kommýnaldyq qyzmetter baǵasy tómendegenin jazǵan bolatynbyz.