BQO-da 40-qa jýyq adam mingen 7 kólik balshyqta turyp qaldy
ORAL. QazAqparat - Batys Qazaqstan oblysynda balshyqqa batqan 7 kólikten 36 adam evakýatsııalandy, dep habarlaıdy QazAqparat tilshisi.
BQO Tótenshe jaǵdaılar departamentinen túsken málimetke qaraǵanda, oqıǵa Syrym aýdanynda boldy.
«Keshe saǵat 20.21 shamasynda Araltóbe aýylynan 15 shaqyrym jerde jeti birdeı avtokóliktiń balshyqtyń kesirinen jolda turyp qalǵany belgili boldy. Búgin túngi saǵat 00.56-da TJ jáne jergilikti atqarýshy organdar qyzmetkerleriniń jáne tehnıkalardyń kúshimen 36 adam evakýatsııalandy», - delingen aqparatta.
Oblysta kesheden beri kún jaýyn-shashyndy bolyp tur.
Eske sala keteıik, budan buryn BQO-da tuman túsip, jel kúsheıetinin jazǵan bolatynbyz.
Foto: www.drive2.ru
