BQO-da 4,5 mlrd teńgege 33 bilim nysany kúrdeli jóndelýde
ORAL. QazAqparat – Batys Qazaqstan oblysynda bıyl memlekettik baǵdarlamalar aıasynda 4,5 mlrd teńgege 33 bilim berý nysany kúrdeli jóndelýde, dep habarlaıdy QazAqparat tilshisi.
Oblys ákimi Ǵalı Esqalıevtiń málim etkenindeı, sonymen qatar oblys boıynsha 8 mlrd teńgege 6 mekteptiń qurylysy júrgizilýde.
Kúrdeli jóndeý jáne qurylys jumystarynyń sapasyna erekshe mán berilýde. Buǵan qoǵam belsendilerin, ata-analardy tarta otyryp, mektep dırektorlary bas-kóz bolýy qajet.
«Qazirgi tańda oblysta 7 úsh aýysymdyq jáne 7 apattyq jaǵdaıdaǵy mektep bar. Mektepterdiń apattylyǵyn jáne úsh aýysymdylyqty joıý maqsatynda memleketten tıisti qarajat bólinip, bıyl paıdalanýǵa beriletin ǵımarattar esebinen apatty jaǵdaıdaǵy 2 mekteptiń, úsh aýysymdy 5 mekteptiń máselesi sheshiletin bolady», dedi óńir basshysy.
Infraqurylymdy damytý mindetterin memlekettik-jekeshelik áriptestik aıasynda sheshý de umyt qalǵan joq. Qazirgi tańda áleýetti jeke ınvestorlarǵa mektep salý úshin oblys ortalyǵynan jer telimderi berildi.
Zachagan kentinde 900 oryndyq mektep salynýda. Apatty jaǵdaıdaǵy №31 mekteptiń ornyna 500 oryndyq ǵımarat salý kózdelýde.
Respýblıkalyq fızıka-matematıka mektebi bıyl qosymsha bilim berý jáne muǵalimder biliktiligin arttyrý ortalyǵyn ashýdy josparlap otyrsa, al 2021 jyly 1-6 synyptarǵa arnalǵan «Fizmat Academy» mektebi iske qosylmaqshy.
Prezıdenttiń bes áleýmettik tapsyrmasy aıasynda stýdentter úshin 644 oryndyq tórt jataqhana boı kóterýde. Sol sekildi M.Ótemisov atyndaǵy Batys Qazaqstan ýnıversıtetiniń 1144 oryndyq jataqhanasy qurylysy da bastaldy.
Ákimniń sózine qaraǵanda, tehnıkalyq jáne kásibı bilim berý uıymdarynda joǵary bilikti kadrlar daıarlaýdy jaqsartý, materıaldyq-tehnıkalyq bazalaryn nyǵaıtý, dýaldyq oqytýdy damytý maqsatynda kolledjderdi senimdi basqarýǵa berý jumystary júrgizilýde. Mysaly, bıyl servıs jáne jańa tehnologııalar kolledjin odan keıingi satyp alý quqyǵynsyz 10 jylǵa senimdi basqarýǵa jekege («Aspazshy» JShS, Balzııa Eveneeva) berildi.
Eske sala keteıik, budan buryn Batys Qazaqstanda 12 myńnan astam búldirshin birinshi synypqa baratynyn jazǵan bolatynbyz.
