BQO-da 380 mekteptiń 249-y shtattyq rejımde jumys jasaýda
ORAL. QazAqparat – Batys Qazaqstan oblysynda 380 memlekettik mekteptiń 249-y shtattyq rejımde, 131-i qashyqtan jumys jasaýda, dep habarlaıdy QazAqparat tilshisi.
Oblystyq bilim basqarmasynyń basshysy Aıgúl Myńbaevanyń brıfıngte málim etkenindeı, óńirde 111 myńnan astam oqýshynyń 22 paıyzy (24621) shtattyq rejımde, 48,6 paıyzy (54196) qashyqtan oqytylýda.
Oblysta bastaýysh synyp oqýshylarynyń 66,2 paıyzy (32681), mektepaldy daıarlyq synyptarynyń 53,3 paıyzy (4286) kezekshi synyptarmen qamtylǵan.
Sol sekildi 34 kolledjde 17 myńǵa jýyq stýdent bar.
Aýyldyq jerlerdegi kontıngenti az 8 kolledjde oqý protsesi shtattyq rejımde uıymdastyryldy.
Sondaı-aq 278 mektepke deıingi uıymda (80 jeke balabaqshada) kezekshi 1039 topta ata-analardyń ótinishi boıynsha 13172 búldirshin (barlyq balanyń 44,9 paıyzy) qamtylǵan.
Aıgúl Ádilgereıqyzynyń sózine qaraǵanda, barlyq shtattyq rejımdegi jáne kezekshi synyptary bar mektepterdiń, kolledjderdiń, mektepke deıingi uıymdardyń jumysy sanıtarlyq -epıdemıologııalyq talaptarǵa sáıkes júrgizilýde. Munyń saqtalýy oblys, qala, aýdan ákimdikteri jáne taýarlar men kórsetiletin qyzmetterdiń sapasy men qaýipsizdigin baqylaý basqarmalarynyń qatań baqylaýynda.
Qazirgi tańda qala men aýdandar ákimderi orynbasarlarynyń tóraǵalyǵymen mektepterdegi sanıtarlyq talaptardyń qatań saqtalýyn qamtamasyz etý baǵytynda jáne ony qadaǵalaıtyn monıtorıngtik toptar quryldy.
Jańa oqý jyly bastalǵannan beri 5 oqýshydan koronavırýs anyqtaldy. Olardyń úsheýi – kezekshi synyptardaǵy bastaýysh synyp shákirtteri, ekeýi qashyqtan oqıdy. Beseýi de indetti ata-anasy men týystarynan juqtyrǵan. Kúni búgin balalarda klınıkalyq kórinister joq, ambýlatorlyq em alýda.
«Aýrý shyqqan synyptardaǵy barlyq oqýshylar men muǵalimderdiń koronavırýsqa tapsyrǵan synamalary teris nátıje kórsetti. Sondyqtan 10 qazannan bastap Oral qalasyndaǵy №9 orta mektebiniń, 13 qazannan №6 orta mekteptiń kezekshi synyptary óz jumysyn qaıta bastady», dedi A.Myńbaeva.
Eske sala keteıik, budan buryn BQO-da taǵy bir oqýshydan koronavırýs anyqtalǵanyn jazǵan bolatynbyz.
