BQO-da 37 mln teńgeni jymqyrǵan «Qazposhta» bólimshesiniń basshysy sottaldy
ORAL. QazAqparat – Batys Qazaqstan oblysynda klıentterge tıesili qarjyny jymqyrǵan «Qazposhta» AQ bólimshesiniń basshysy 7 jylǵa sottaldy, dep habarlaıdy QazAqparat tilshisi.
QR Qarjy mınıstrligi Qarjy monıtorıngi komıtetiniń baspasóz qyzmetinen túsken málimetke qaraǵanda, atalǵan qylmystyq isti BQO boıynsha ekonomıkalyq tergeý departamenti aıaǵyna deıin jetkizdi.
Qaztalov aýdanynda «Qazposhta» AQ Jalpaqtal poshta bólimshesiniń bastyǵy qyzmet babyn paıdalanyp, 37 mln astam teńgeni zańsyz jymqyrǵan. Ol «Colvir» baǵdarlamasy arqyly birqatar zańdy jáne jeke tulǵalardyń qarjysyn óziniń jeke karta shotyna aýdarǵan. Oǵan qosa atalǵan baǵdarlama jumys istemeı qaldy degen jeleýmen klıentterge kvıtantsııasyn bermeı, jiberiletin zattardy tóleýge arnalǵan aqshany da ıemdengen.
Qaztalov aýdandyq №2 sotynyń úkimimen poshta bólimshesiniń bastyǵy QR QK 189-baby 4-bóligi 2-tarmaǵyna sáıkes aıypty dep tanylyp, 7 jylǵa bas bostandyǵynan aıyryldy. Ol sonymen qatar memlekettik jáne kommertsııalyq uıymdarda materıaldyq jaýapkershilikke baılanysty qyzmetter atqarý quqyǵynan ómir boıyna aıyryldy.
Eske sala keteıik, budan buryn BQO-da sapasyz munaı ónimderin jetkizgen kásiporyn dırektory sottalǵanyn jazǵan bolatynbyz.
