BQO-da 37 qylmystyq is boıynsha 64 adamǵa aıyptaý úkimi shyǵaryldy
ORAL. QazAqparat - Batys Qazaqstan oblysynda ótken jyly 74 adamǵa qatysty 43 qylmystyq is qaraldy. Bul týraly BQO qylmystyq ister jónindegi mamandandyrylǵan aýdanaralyq sotynyń tóraǵasy Qaırat Shalqarov málim etti, dep habarlaıdy «QazAqparat» HAA tilshisi.
Onyń aıtýynsha, sonyń ishinde 37 qylmystyq is boıynsha 64 adamǵa aıyptaý úkimi shyǵaryldy. 52 adam bas bostandyǵynan aıyrylyp, 12 sottalýshynyń bas bostandyǵy shekteldi. Bir adam aqtaldy. Eki adamdy májbúrli túrde emdeý mekemesine joldaý týraly qaýly shyǵaryldy.
Jyl ishinde sot óndirisine 71 adamǵa qatysty 40 qylmystyq is túsken, bul aldyńǵy jylǵydan 16,6 paıyzǵa az.
Alqabılerdiń qatysýymen bir qylmystyq is qaralsa, ekinshisi áli aıaqtalǵan joq.
BQO kámeletke tolmaǵandar isteri jónindegi mamandandyrylǵan aýdanaralyq sotynyń tóraǵasy Telman Ibrashevtiń sózine qaraǵanda, bul sotta da qylmystyq ister sany qysqarǵan. Mysaly, 2015 jyly 61 adamǵa qatysty 40 qylmystyq is qaralsa, ótken jyly 32 is (47 adam) bolǵan. Bul qylmystardyń basym kópshiligi urlyq pen kisi tonaý, adamdardy soqqyǵa jyǵý bolyp keledi. Alty jasóspirimniń bostandyǵy shektelse, ekeýi qylmystyq jazaǵa tartylyp, bireýi qoǵamdyq jumysqa jegilgen. Toǵyz jasóspirimge qatysty qylmystyq is taraptardyń medıatsııa jolymen mámilege kelýine baılanysty qysqartylǵan.
Jasóspirimder sotynda sondaı-aq 385 azamattyq is (2015 jyly - 248) qaraldy. Medıatsııa jolymen 148 azamattyq is sheshilgen. Oǵan qosa ótken jyly 290 (2015 jyly - 962) ákimshilik is qaralyp, 197 quqyq buzýshyǵa aıyppul salynyp, bireýine eskertý berilgen. 14 ákimshilik is qysqartylǵan.
