BQO-da 36 jylqyny urlap, ońtústik óńirlerge jóneltip otyrǵan kúdikti ustaldy
ASTANA. KAZINFORM — Batys Qazaqstan oblysynda quny 14 mln teńgeden asatyn 36 jylqyny urlady degen kúdikpen 48 jastaǵy er adam ustaldy. Bul týraly Polisia.kz jazdy.
BQO PD krımınaldyq polıtsııa basqarmasynyń qyzmetkerleri Qaratóbe jáne Syrym aýdandyq polıtsııa bólimderiniń qyzmetkerlerimen birlesip, aýqymdy jedel-izdestirý is-sharalaryn júrgizdi. Nátıjesinde mal urlyǵyna qatysy bar kúdikti ustaldy.
Tergeý barysynda kúdiktiniń erkin jaıylymda júrgen jylqylardy aıdap, óz aýlasyna qamap, keıin júk kólikterine tıep, elimizdiń ońtústik óńirlerine jóneltip otyrǵany anyqtaldy.
— Qazirgi ýaqytta polıtsııa kúdiktiniń jalpy quny 14 mln teńgeden asatyn 36 bas jylqyny urlaýǵa qatysy bar ekenin anyqtady. Kúdikti ýaqytsha ustaý ızolıatoryna qamaýǵa alyndy. Zańnamaǵa sáıkes, mal urlyǵy úshin 12 jylǵa deıin bas bostandyǵynan aıyrý jáne múlkin tárkileý túrindegi jaza kózdelgen, — delingen habarlamada.
Polıtsııa azamattarǵa maldaryn qaraýsyz qaldyrmaýdy, olardy mindetti túrde tańbalap, GPS-treker ornatýdy usynady. Bul sharalar mal urlyǵynyń aldyn alýǵa jáne joǵalǵan nemese urlanǵan maldy jedel anyqtaýǵa múmkindik beredi.
Buǵan deıin de BQO-da mal urlyǵynyń birneshe deregi ashylǵanyn jazǵan edik.
