BQO-da 342 myń gektar jer paıdalanylmaı otyr

ORAL. QazAqparat – Batys Qazaqstan oblysynda 342,9 myń gektar jer paıdalanylmaı otyr. Bul týraly oblys ákimi Ǵalı Esqalıevtiń tóraǵalyǵymen ótken keńeste aıtyldy, dep habarlaıdy QazAqparat tilshisi.

Jıynda atalyp ótilgenindeı, Memleket basshysy Qasym-Jomart Toqaevtyń bıylǵy Joldaýda bergen aýyl sharýashylyǵy jerlerin tıimdi paıdalaný týraly tapsyrmasyna sáıkes óńirde júıeli ister atqarylyp jatqanymen, bul áli de jetkiliksiz.

Oblystyq jer qatynastary basqarmasynyń basshysy Murat Ómirálıevtiń aıtýynsha, 2019 jáne bıylǵy jyly óńirde 907,5 myń gektar aýyl sharýashylyǵy maqsatyndaǵy jerdiń paıdalanylmaı jatqany anyqtaldy. Túsindirý jumystary men BAQ betterinde jaýapsyz jer paıdalanýshylar tizimin jarııalaý nátıjesinde 113,3 myń gektar jer memleket menshigine qaıtaryldy. Sonymen qatar 451,3 myń gektardy sol jerdi paıdalanýshylar ıgerýge kiristi. ıAǵnı 546,6 myń gektar nemese barlyq anyqtalǵan jer kóleminiń 62 paıyzy boıynsha naqty sharalar alyndy. Áıtse de 342,9 myń gektar jer (38 paıyz) áli de paıdalanylmaı qalyp otyr.

Basqarma basshysynyń sózine qaraǵanda, qazirgi tańda memleketke qaıtarylǵan 113,3 myń gektardyń 34,3 myńy nemese 30 paıyzy aýyl sharýashylyǵy aınalymyna engizildi.

Memleket menshigine qaıtarylǵan jerlerdi aınalymǵa engizý maqsatynda jergilikti atqarýshy organdar konkýrstar ótkizýde.

«2020 jyly jalpy kólemi 233 myń gektardy quraıtyn 314 jer telimin tabystaý maqsatynda 24 konkýrs ótkizildi. Jyl aıaǵyna deıin taǵy da 237 myń gektardy quraıtyn 276 jer telimi boıynsha 10 konkýrs ótkizý josparlanýda», degen M.Ómirálıev ıgerilmeı jatqan jer telimderin keri qaıtarý jumysy jalǵasatynyn jetkizdi. Mundaı nysandar boıynsha tekserý jumystary júrgizilip, jerlerin ıgermegen jaǵdaıda nusqama beriledi. Sosyn jer salyǵynyń bazalyq mólsherlemesin on esege deıin arttyrý, nusqamany oryndamaǵan jaǵdaıda sot arqyly májbúrlep jer telimin alý sharalary qabyldanady. Jer telimin májbúrli túrde qaıtarǵandar úsh jyl kóleminde, ózgerister engizilgen jaǵdaıda 5 jyl boıy basqa jer telimine qol jetkize almaıdy.

Sonymen qatar zańnamalyq aktilerge túzetýler engizilgennen keıin aýyl sharýashylyǵy jerlerine monıtorıng jumystaryn júrgizý kezinde ǵaryshtyq túsirilimder qoldanylatyn bolady.

Óńir basshysy Oral qalasy jáne aýdandar boıynsha maqsatyna saı paıdalanylmaı otyrǵan jer telimderi barshylyq ekendigin aıtyp, solar boıynsha naqty jumystaný jóninde tıisti tapsyrmalar berdi.

Eske sala keteıik, budan buryn Oralda keıbir kóshelerde jol jóndeý jumystarynyń baıaý júrgizilip jatqanyn jazǵan bolatynbyz.