BQO-da 340-qa jýyq sharýashylyq asyl tuqymdy mal ósirýmen aınalysýda
ORAL. QazAqparat – Batys Qazaqstan oblysynda 338 sharýashylyq asyl tuqymdy mal ósirýmen aınalysýda, dep habarlaıdy QazAqparat tilshisi.
Oblys ákimi Ǵalı Esqalıevtiń aıtýynsha, asyl tuqymdy reprodýktor sharýashylyq sany ótken jylǵydan (277) 22 paıyzǵa ósip otyr.
Sonyń ishinde 274 sharýashylyq asyl tuqymdy iri qara (52,8 myń bas), 32-si qoı (28,9 myń bas), 31-i jylqy (9,9 myń bas) jáne bireýi túıe (265 bas) ósirýmen shuǵyldanady.
Asyl tuqymdy iri qara mal ósirý boıynsha oblys respýblıkada úzdik úshtikti túıindep otyr.
Óńirde mal basy turaqty ósýde. Ótken jyldyń segiz aıymen salystyrǵanda, iri qara – 7,1, jylqy – 13,9, qoı – 1,5, eshki – 5,3, túıe 1,8 paıyzǵa kóbeıdi.
«Jalpy, barlyq iri qara mal basy boıynsha oblys elimizde 4-orynda tur. Sonyń ishinde etti baǵyttaǵy iri qarany ósirý jóninen aldyńǵy lekte keledi. Óńirde negizinen etti baǵyttaǵy mal ustalady. Bul baǵytta áleýetimiz joǵary bolǵandyqtan, aldaǵy ýaqytta da osy etti mal sharýashylyǵyn damytýǵa basymdyq berilmek», dedi oblys basshysy.
Іri qarany jaı kóbeıtip qana qoımaı, tuqymdyq túrlendirýdiń mańyzy zor. Tuqymdyq túrlendirýge oblys boıynsha 162,3 myń bas analyq mal tartyldy (jospar – 208,1 myń bas, 78 paıyz), bul jalpy analyq mal basynyń 55,5 paıyzyn quraıdy. Bul jóninen BQO respýblıka boıynsha eń joǵary kórsetkishke ıe.
Tuqymdyq túrlendirý jergilikti taýarly maldyń sapasyn aıtarlyqtaı arttyrýǵa múmkindik berýde. Mysaly, iri qaranyń ortasha tirileı salmaǵy sońǵy úsh jylda 336 kg-dan 345 kılogramǵa deıin ósti.
Mal basynyń kóbeıýine «Sybaǵa» sekildi memlekettik baǵdarlamalar óz yqpalyn tıgizýde. Jyl basynan beri óńirge 1109 bas iri qara ákelindi. Sonyń 41,6 paıyzy asyl tuqymdy aberdın-angýs, 41,1 paıyzy gereford, 17,3 paıyzy qazaqtyń aqbas jáne áýlıekól tuqymdaryna tıesili.
«Oral qalasyndaǵy Jáńgir han atyndaǵy agrarlyq-tehnıkalyq ýnıversıteti ǵalymdarymen birlese otyryp, mal sharýashylyǵynda selektsııalyq ádisterdiń pármendiligin arttyrý, etti mal sharýashylyǵynda modeldi fermany ashý arqyly joǵary tehnologııalardy engizý, joǵary ónimdi jaıylymdardy iske qosyp, olardy tıimdi paıdalaný baǵytynda ǵylymı jobalar júzege asyrylýda. Munyń bári mal sharýashylyǵyn damytýǵa serpin bermek», dedi Ǵ.Esqalıev.
