BQO-da 30 mln tekshe metr tasqyn sý kólderge jiberildi

ASTANA. KAZINFORM – Batys Qazaqstan oblysynda tasqyn sýdy ıgerý jumystary jalǵasyp jatyr.

«Qazsýshar» mekemesiniń Batys Qazaqstan oblysy boıynsha fılıaly Reseıden kelgen tasqyn sýdyń 30 mln tekshe metrin oblystaǵy Qamys-Samar kólderine jiberdi. Atalǵan kólderge sońǵy 20 jylda sý barmaǵan. Odan bólek, «Qazsýshar» mamandary sońǵy jyldary qurǵaýǵa aınalǵan Edilsor, Jaltyrkól, Birqazan, Sorkól, Saltanat jáne basqa da sý aıdyndaryna tasqyn sýdy jibergeli jatyr», - dedi Sý resýrstary jáne ırrıgatsııa mınıstrliginiń resmı ókili Móldir Ábdýalıeva OKQ-de ótken brıfıngide.

Resmı ókildiń aıtýynsha, búginde BQO-daǵy Jánibek sý sorǵy stansasyn iske qosý boıynsha daıyndyq jumystary júrgizilýde.

«Nysan Reseı Federatsııasynyń Volgograd oblysynan kelgen sýdy Batys Qazaqstan oblysynyń Jánibek jáne Bókeı ordasy aýdandarynyń 9 aýyldyq okrýginiń aýmaǵyna aıdaıdy. Bıyl 25,8 mln tekshe metr sý jiberý josparlanyp otyr», - deıdi ol.

Buǵan deıin sý tasqynyna ushyraǵan BQO-ǵa qaı elderden gýmanıtarlyq kómektiń jetkizilip jatqanyn habarlaǵan edik.