BQO-da 3 mln dana maskany Máskeýge apara jatqandar ustaldy
ORAL. QazAqparat – Batys Qazaqstan oblysynda 3,1 mln astam dana maskany Máskeýge apara jatqandar ustaldy, dep habarlaıdy QazAqparat tilshisi.
QR UQK Shekara qyzmetiniń BQO boıynsha departamentinen podpolkovnık Asqar Qazbekovtiń málim etkenindeı, oqıǵa 18 sáýirde «Syrym» ótkizý beketinde oryn aldy.
BQO boıynsha ekonomıkalyq tergeý departamentimen birlese júrgizilgen «Kýrer» sharasy barysynda medıtsınalyq maskany áketýdiń tórt deregi tirkeldi.
Saǵat 01.30-da shekarashylar qazaqstandyq azamat aıdap kele jatqan «RENO» júk kóligin arnaıy tehnıkalyq quraldardyń kómegimen teksergen kezde halyq tutynatyn taýarlar retinde jasyrylǵan 324 qorap tabyldy. Qoraptardy ashqan kezde 1,646 mln bir ret qoldanylatyn medıtsınalyq maska shyqty.
Sol sekildi qyrǵyzstandyq azamat júrgizgen «VOLVO» avtokóligin teksergende, 229 qorap tabyldy. Munda 1,462 mln dana bir ret qoldanylatyn medıtsınalyq maska jasyrylǵan bolyp shyqty.
Qazaqstandyq azamat aıdaǵan «VOLVO» avtokóliginen 18 qoraptan 48 myń dana maska tabyldy.
Taǵy bir «VOLVO» avtokóliginen (júrgizýshisi – Qazaqstan azamaty) 5 qoraptan 9726 dana maska shyqty.
Bul kólikterdiń bári de Almatydan Máskeýge bara jatqan.
Barlyǵy 3 165 726 dana medıtsınalyq maskanyń quny shamamen 380 mln teńgeni quraıdy.
Qujattar rásimdelgennen keıin júk BQO boıynsha ekonomıkalyq tergeý departamenti qyzmetkerlerine berildi.
Eske sala keteıik, budan buryn 464 myń maskany Máskeýge áketip bara jatqan júrgizýshiniń ustalǵanyn jazǵan bolatynbyz.
