BQO-da 3 700-den astam iri qara malynan brýtsellez anyqtaldy
ORAL. KAZINFORM — Batys Qazaqstan oblysynda jyl basynan beri 590 myń bas iri qara maly brýtsellezge tekserildi.
BQO veterınarııa basqarmasynyń basshysy Abzal Bralıevtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 3 723-inen aýrý anyqtaldy. Zaqymdaný paıyzy — 0,6 paıyz.
Abzal Serikulynyń sózine qaraǵanda, byltyr 864 myń bastyń 5 479-ynan (0,6 paıyz) brýtsellez shyqqan edi.
Sonymen qatar usaq maldyń arasynda zerttelgen 775 668 bastyń 609-ynan aýrý (0,1 paıyz) tabyldy. Byltyr 1 mln 358 bas usaq maldyń 867-si oń nátıje (0,1 paıyz) kórsetken edi.
— 2026 jyly aýrý janýarlardy sanıtarııalyq soıýdy uıymdastyrýǵa oblystyq bıýdjetten 56,8 mln teńge qarastyrylǵan. Brýtsellezge shaldyqqan janýarlar oblys aýmaǵyndaǵy 12 soıý uıymyna tasymaldanyp, sanıtarlyq soıý júrgizilip otyr. Jyl basynan beri 3 565 bas iri qara, 528 bas usaq mal sanıtarlyq soıý oryndaryna tapsyryldy. Et óńdeý kásiporyndaryna tapsyrylǵan 207 bas usaq mal ıelerine 3,6 mln teńge ótemaqy tólendi, — dedi Abzal Bralıev.
Onyń aıtýynsha, bıyl oblys boıynsha 7 aýrý oshaǵy tirkeldi. Sonyń ishinde iri qara maly arasynda ınfektsııalyq rınotraheıtten 3 (Aqjaıyq aýdanynyń Shabdarjap, Atameken, Jolap aýyldary), brýtsellezden 2 (Báıterek aýdanynyń Kóshim aýyly, Terekti aýdanynyń Podstepnoe aýyly), qarasan aýrýynan 1 oshaq (Terekti aýdanynyń Saryómir aýyly) anyqtaldy. Oǵan qosa Báıterek aýdany Dostyq aýylynda qarsaqtyń qutyrǵany belgili boldy.
— Aýrý oshaqtaryna tıisti veterınarııalyq is-sharalar kesheni tolyq kólemde júrgizilip, ınfektsııalyq rınotraheıt, qarasan jáne 1 brýtsellez aýrýynyń oshaqtary joıyldy. Qazirgi tańda iri qara malynyń brýtsellezi tirkelgen 1 oshaqta jáne qarsaqtan qutyrý anyqtalǵan jerde veterınarııalyq is-sharalar júrgizilip jatyr. Oblys aýmaǵynda epızootııalyq jaǵdaı turaqty, — dep qosty Abzal Bralıev.
Basqarma málimeti boıynsha bıyl óńirdiń epızootııalyq qaýipsizdigin qamtamasyz etýge 6,7 mlrd teńge bólindi. Bul qarajat epızootııaǵa qarsy is-sharalardy júzege asyrýǵa, sanıtarlyq maldardyń tasymalyna, aýyl sharýashylyǵy janýarlaryn birdeılendirýge arnalǵan syrǵalardy satyp alýǵa, veterınarııalyq preparattardy tasymaldaýǵa, sondaı-aq salanyń materıaldyq-tehnıkalyq bazany nyǵaıtýǵa baǵyttalǵan.
Eske sala keteıik, budan buryn BQO-da aýrýdan maly shyǵynǵa ushyraǵan sharýalar ótemaqy ala ma, sony jazǵan edik.
