BQO-da 3,5 tonna balyq tıelgen avtokólik ustaldy
ORAL. QazAqparat - Batys Qazaqstan oblysynda «Bekire-2019» jedel aldyn alý sharasy barysynda 3,5 tonna balyq tıelgen avtokólik ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 5 sáýir kúni shamamen saǵat 02.40-ta Oral-Atyraý joly boıynda oryn aldy.
Aqjaıyq aýdany Chapaev aýyly tusynda 1980 jylǵy A. degen azamat aıdap kele jatqan «GAZ-53» avtokóligi toqtatyldy. Onyń 3,5 tonnadaı qara balyqty tıisti qujattarsyz tasymaldaǵany anyqtaldy.
Aqjaıyq aýdandyq polıtsııa bólimi atalǵan derek boıynsha QR QK 196-baby 1-bóligine sáıkes (kórineý qylmystyq jolmen tabylǵan múlikti ıemdený nemese ótkizý) sotqa deıingi tergeý amaldaryn júrgizýde.
Balyqtyń qaıdan alynǵandyǵy tekserilýde.
Óńirde Jaıyq-Kaspıı basseıni aýmaǵynda 1 sáýir - 31 mamyr aralyǵynda «Bekire-2019» sharasy ótkizilýde.
Eske sala keteıik, budan buryn BQO-da toǵanda úsh tonnadan astam balyqtyń qyrylyp qalǵanyn jazǵan bolatynbyz.
