BQO-da 290-nan astam kıik múıizin zańsyz saqtaǵan turǵyn sottaldy

ORAL. KAZINFORM — Báıterek aýdandyq sotynda kıik múıizderin zańsyz taýyp, saqtaǵan ári tasymaldaǵan, sóıtip memleketke asa iri mólsherde zalal keltirgen turǵynǵa qatysty úkim shyqty.

BQO sotynyń baspasóz qyzmetinen málim etkenindeı, aqbóken derıvattaryn paıdalanýǵa tyıym salynǵanyna qaramastan, atalmysh turǵynnyń Bókeı ordasy aýdany aýmaǵynda bolǵan kezde 291 dana kıik múıizin zańsyz jolmen taýyp, saqtap, tasymaldaǵany anyqtaldy.

Osylaısha, ol memleketke 429 mln 079,5 myń teńge zalal keltirgen.

Sottalýshy kinásin tolyq moıyndaǵanymen, eseptelgen zalal somasymen kelispedi.

Sot ony aıypty dep taýyp, múlkin tárkileýsiz 7 jyl bas bostandyǵynan aıyrý jazasyn qaýipsizdigi eń tómen qylmystyq-atqarý júıesi mekemesinde óteýge úkim shyǵardy. Sondaı-aq sottalýshy 5 jyl merzimge ańshylyq qyzmetpen aınalysý quqyǵynan aıyryldy.

- Sot sottalýshyǵa «Qazaqstan Respýblıkasy Konstıtýtsııasynyń otyz jyldyǵyna baılanysty raqymshylyq jasaý týraly» QR Zańyn qoldanyp, jaza merzimin besten bir bóligine qysqartty. Sondaı-aq sottalýshydan memleket paıdasyna 429 mln 079,5 myń teńge zalal jáne óndirip alynǵan zalal somasynan 1 paıyz memlekettik baj esebinde 12 mln 872,385 myń teńge óndirildi, - dep habarlady vedomstvodan.

Úkim zańdy kúshine engen joq.

Eske sala keteıik, budan buryn BQO-da qarý men kıik múıizin zańsyz saqtaǵan sharýa qojalyǵynyń basshysy ustalǵanyn jazǵan edik.