BQO-da 29 oqýshydan KVI anyqtaldy
ORAL. QazAqparat – Batys Qazaqstan oblysynda jeltoqsan aıynda 29 oqýshydan indet shyǵyp, bes mekteptegi 8 synyp karantınge jabyldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, olardyń 12-sinde aýrý belgileri bolǵan, qalǵan 17-sinde sımptomsyz ótýde.
Koronavırýs bes mekteptiń 8 synybynda anyqtalýyna baılanysty naýqastarmen qarym-qatynasta bolǵan oqýshylar men muǵalimder úılerinde oqshaýlandy. Oral qalasy men aýdandardyń bas sanıtar dárigerleriniń qaýlysyna sáıkes bes mekteptiń 8 synyby karantınge jabyldy.
Oqýshylar aýrýdy otbasy músheleri men týysqandarynan juqtyrǵan.
Balabaqsha mekemelerinde jeltoqsan aıynda kovıd tirkelgen joq. Sondaı-aq, óńirdegi medıtsınalyq mekemeler de shtattyq rejımde jumys isteýde.
Nurlybek Ermekulynyń aıtýynsha, oblysta 1 jeltoqsannan beri barlyǵy 370 adamnyń aýyrǵany tirkelse, sonyń 215-i nemese 58,1 paıyzy Oral qalasynyń úlesine tıedi. Sol sekildi Bórli aýdanynda – 54, Báıterekte – 49, Aqjaıyqta – 10, Terektide – 7, Tasqalada – 6, Jańaqala men Bókeı ordasynda – 5, Shyńǵyrlaýda – 4, Syrymda 1 adam syrqattanǵan. Jánibek pen Qaratóbe aýdandarynda bul aıda indet tirkelgen joq.
Oblys boıynsha jalpy indet juqtyrǵandar sany 8447-ge jetip, sonyń 7505-i saýyǵyp shyqsa, 144-i kóz jumdy.
Eske sala keteıik, budan buryn BQO-da 119 myńǵa jýyq adamnyń saqtandyrylmaǵanyn jazǵan bolatynbyz.
