BQO-da 29 mln teńge jymqyrǵan balabaqsha esepshisiniń isi sotqa joldandy

ORAL. KAZINFORM — Batys Qazaqstan oblysy boıynsha ekonomıkalyq tergep-tekserý departamenti prokýratýranyń úılestirýimen óńirdegi balabaqshalardyń birinde 29 mln teńgeniń jymqyrylýyna qatysty qylmystyq isti sotqa joldady.

BQO-da 29 mln teńge jymqyrǵan balabaqsha esepshisiniń isi sotqa joldandy
Foto: freepik.com

Departamenttiń baspasóz qyzmetinen málim etkenindeı, tergeý derekterine sáıkes mektepke deıingi uıymnyń esepshisi basshylyqtyń senimin paıdalanyp, balabaqsha meńgerýshisiniń elektrondyq tsıfrlyq qoltańbasyna (ETsQ) qol jetkizgen.

Ol meńgerýshiniń ETsQ-syn jáne býhgalterlik baǵdarlamany paıdalanyp, ózine negizsiz jalaqy eseptep, qarajatty jeke bank shotyna júıeli túrde aýdaryp otyrǵan.

— Osynyń saldarynan memleketke 29 mln teńge kóleminde zalal keltirilgen. Departament uıym basshylaryna bıýdjet qarajatynyń jumsalýyn, jalaqynyń eseptelýin jáne ETsQ-nyń paıdalanylýyn tıisti deńgeıde baqylaý kerektigin eske salady. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy, — dep habarlady vedomstvodan.

Eske sala keteıik, budan buryn Oralda sýmen qamtý jabdyqtaryn satyp alý barysynda 421 mln teńge bıýdjet qarajatyn jymqyrýdyń joly kesilgenin jazǵan edik.