BQO-da 28 mádenıet nysany jóndelýde
ORAL. QazAqparat - Táýelsizdiktiń 25 jyldyǵyna oraı Zelenov aýdanynda Rýbejın aýyldyq klýby kúrdeli jóndeýden keıin qaıta ashyldy, dep habarlaıdy QazAqparat tilshisi.
Ótken ǵasyrdyń sekseninshi jyldary salynǵan ǵımaratty jóndeýge 93 mln. teńge bólinip, bul jumysty «Batys Servıs Stroı» JShS atqaryp shyqty. Jańartylǵan ǵımaratta klýbqa qosa kitaphana men sport zaly da iske qosyldy.
Klýbtyń saltanatty ashylý rásimine qatysqan aýdan ákimi Kárim Jaqypov aýyl turǵyndaryn Táýelsizdik merekesimen quttyqtap, endi Rýbejınde mádenı-sporttyq sharalardyń kóptep uıymdastyrylýyna múmkindik mol ekendigin atap kórsetti.
«Nur Otan» partııasy Zelenov aýdandyq fılıaly tóraǵasynyń birinshi orynbasary Nurjan Dúzbatyrdyń aıtýynsha, aýdan boıynsha tórt klýb aǵymdaǵy jóndeýden ótkizilse, taǵy ekeýi kúrdeli jóndelýde. Sondaı-aq bıyl bir mektep jańadan salynyp, taǵy bireýi kúrdeli, segizi aǵymdaǵy jóndeýden ótkizildi.
«Táýelsizdigimizdiń 25 jyldyǵy toılanyp otyrǵan mereıli jyly óńirde 28 mádenıet nysanyn kúrdeli jáne aǵymdaǵy jóndeýge barlyǵy 596,472 mln. teńge bólindi. Sonyń ishinde 510,386 mln. teńgege 10 klýb pen mádenıet úıi kúrdeli jóndelýde. Sondaı-aq taǵy 16 klýb pen bir-birden kitaphana men park aǵymdaǵy jóndeýden ótkizilýde. Bulardyń birqatarynda jumys áli jalǵasýda. Oblysta mundaı kólemde mádenıet nysandary jóndelip kórgen emes», dedi QazAqparat tilshisine oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov.
