BQO-da 26 tonna medıtsına qolǵabyn Máskeýge apara jatqan júk kóligi ustaldy

ORAL. QazAqparat – Batys Qazaqstan oblysynda 26 tonna medıtsına qolǵaby tıelgen avtokólik ustaldy, dep habarlaıdy QazAqparat tilshisi.

QR UQK Shekara qyzmeti 2029-áskerı bólimi komandıriniń orynbasary, podpolkovnık Asqar Qazbekovtiń málim etkenindeı, oqıǵa 16 naýryz kúni saǵat 19.30-da «Tasqala» ótkizý beketinde oryn aldy.

Qazaqstan Úkimeti medıtsınalyq jeke qorǵaý quraldaryn elden alyp ketýge tyıym salǵan bolatyn.

Soǵan qaramastan, shekarashylar Oraldan Máskeýge baǵyt alǵan INTERNATIONAL júk kóligin qaraǵan kezde, odan 26 tonna lateks qolǵaptary tabyldy.

Júktiń ilespe qujattarynda 3,9 mln qolǵap ekendigi jazylǵan. Baǵasy – 3,666 mln teńge.

Júk Oral qalasyndaǵy «Torgovyı UNEX» JShS-da tıelgen.

«Júk kóligin BQO boıynsha ekonomıkalyq tergeý departamentine tapsyrý kózdelýde» dedi QazAqparat tilshisine A.Qazbekov.