BQO-da 251 myń adamǵa vaktsınanyń birinshi komponenti salyndy
BQO densaýlyq saqtaý basqarmasy basshysynyń orynbasary Gúlnár Ábdirahmanova óńirlik kommýnıkatsııalar qyzmeti alańynda ótken brıfıngide málim etkendeı, bul – ekpe egilýge tıis turǵyndardyń 60,7 paıyzy.
Sonyń ishinde 179 821 adam reseılik «Spýtnık V» vaktsınasyn qabyldady.
Sondaı-aq 236 067 adam vaktsınanyń ekinshi komponentimen egilip úlgerdi.
G.Ábdirahmanovanyń aıtýynsha, oblys boıynsha 3376 adam Pfizer kompanııasynyń vaktsınasymen egildi.
Sonyń 1967-si jasóspirimder bolsa, 92-si – júkti, 1317-si – bala emizetin áıelder.
Oǵan qosa 2825 turǵyn revaktsınatsııadan ótti.
«Kúni búginge deıin óńirde tirkelgen 39 873 naýqastyń 38 376-sy nemese 96,2 paıyzy jazylyp shyqty. Sonyń 15 068-i statsıonarlyq, 23 308-i ambýlatorlyq em aldy. Pandemııa bastalǵannan beri 842 adam koronavırýstan kóz jumdy. Qazirgi tańda 286 naýqas ambýlatorlyq, 112-si statsıonarlyq em alýda. Sonyń ishinde 11-i jansaqtaý bólimshesinde jatyr. Іndetten qorǵanýdyń senimdi joly ekpe alý ekendigin umytpaıyq. Sondaı-aq ımmýnıtet deńgeıin birqalypty ustap turý úshin revaktsınatsııadan ótý qajet», dedi G.Ábdirahmanova.
Eske sala keteıik, budan buryn Batys Qazaqstanda jańajyldyq is-sharalardy ótkizý shekteletinin jazǵan bolatynbyz.