BQO-da 251 km avtojol jóndeldi
ORAL. QazAqparat - Batys Qazaqstan oblysynda 2016 jyly 251 avtojol jóndeldi, dep habarlaıdy «QazAqparat» HAA tilshisi.
Oblys ákimdiginen túsken málimetke qaraǵanda, sonyń 105,5 shaqyrymy - respýblıkalyq, 145,5 shaqyrymy - jergilikti joldar.
Joldardy jóndeý men kútip ustaýǵa 16 mlrd astam teńge jumsaldy. Sonyń ishinde Oral-Tasqala-RF shekarasy kúre jolyn «Nurly jol» baǵdarlamasyna sáıkes qaıta salý jumysy jalǵasýda. Sondaı-aq respýblıkalyq Chapaev-Jalpaqtal-Qaztalov, Qaztalov-Jánibek, Oral-Atyraý jolynyń keıbir bólikteri, oblystyq mańyzy bar Chapaev-Jańaqala, Aqsaı-Shyńǵyrlaý, Ańqaty-Saryómir, Jympıty-Qaratóbe, Oral-Kırsanov jáne Buldyrty aýylyna kireberis jol kúrdeli jóndeldi.
Oral qalasynda 16 kóshede 18 km jol jóndelse, sonyń ishinde 8 kóshede aıaqtaldy, qalǵany kelesi jyly márege jetpek. Buǵan barlyǵy 2,6 mlrd teńge qaralsa, sonyń 545 mln. teńgesi jergilikti, 255 mln teńgesi respýblıkalyq bıýdjet, 1,8 mlrd teńgesi «QPO b.v.» kompanııasy qarjysy esebinen berildi. Oǵan qosa «QPO b.v.» qarjysyna Bórli-Aqsaı jolynyń 38 shaqyrymy ortasha jóndeýden ótkizildi.
«Óńirdegi avtojoldardyń jóndelýin Elbasymyz únemi nazarda ustap otyr, soǵan sáıkes tıisti qarjy bólinýde. Sondyqtan joldardy kúrdeli jóndeý jańa jylda da jalǵasatyn bolady», dedi «QazAqparat» tilshisine oblys ákimi Altaı Kólginov. 
