BQO-da 241 myńǵa jýyq adam koronavırýsqa qarsy vaktsına aldy

ORAL. QazAqparat – Batys Qazaqstan oblysynda 240 990 adam koronavırýsqa qarsy vaktsınanyń birinshi komponentimen egildi, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, bul – oblys boıynsha egilýge tıisti turǵyndardyń (414 389) 58,2 paıyzy.

Oral qalasynda barlyǵy 224 092 adam egilýi kerek bolsa, sonyń 124 192-si alǵashqy ekpesin saldyrdy. Sondaı-aq Bórli aýdanynda 34 105 turǵynnyń 23 469-y, Báıterekte 29 999 adamnyń 17 993-i birinshi komponentpen egildi.

Ótken táýlikte 613 adam birinshi komponentti qabyldasa, sonyń 18-i – sozylmaly derti bar adamdar.

Basqarma málimetine qaraǵanda, pandemııa bastalǵannan beri barlyǵy 39 223 naýqas tirkeldi.

Qazirgi tańda 511 adam ambýlatorlyq em alýda. Oblys statsıonarlarynda jatqan 153 naýqastyń 15-i aýyr halde. Sonyń ishinde bireýi ınvazıvti jasandy tynys alý apparatyna qosylǵan.

Eske sala keteıik, budan buryn BQO-da jyl basynan beri koronavırýs juqtyrǵandar sany 30 myńǵa jýyqtaǵanyn jazǵan bolatynbyz.