BQO-da 23 mektep jańa sport jabdyqtaryna qol jetkizdi

Óńirlik kommýnıkatsııalar qyzmeti alańynda bul týraly búgin Oral qalasynyń ákimi Murat Muqaev pen «Samruk-Kazyna Trust» qorynyń resmı ókili - basqarýshy dırektory Lıma Dıas málim etti.

L.Dıastyń aıtýynsha, «Samuryq-Qazyna» AQ kompanııalar tobynyń áleýmettik ınvestıtsııalary «Meniń elim» baǵdarlamasyna sáıkes jumsalýda. Baǵdarlama boıynsha 2017 jyly Batys Qazaqstan oblysyna 504 mln teńge baǵyttaldy. Bıyl Jaıyq óńirinde oblys ákimdiginiń qoldaýymen úsh joba júzege asyrylýda. Joba operatory - «Samruk-Kazyna Trust» áleýmettik jobalardy damytý qory.
Atap aıtqanda, «Túzetý mektepterine jáne ınternattarǵa qajetti jabdyqtar» jobasy boıynsha oblystaǵy 3 túzetý mektebi 22,982 mln teńgeniń jańa qural-jabdyqtarymen jaraqtandyryldy. Olar: «Kórý qabileti buzylǵan balalarǵa arnalǵan oblystyq arnaıy mektep-ınternaty» KMM (8 mln 975 myń teńge), «Aqyl-oı kemistigi bar balalarǵa arnalǵan oblystyq arnaıy mektep-ınternaty» KMM (6 mln 538 myń teńge) jáne «Oblystyq estý jáne sóıleý qabileti buzylǵan balalarǵa arnalǵan arnaýly mektep-ınternat kesheni» KMM (7 mln 468 myń teńge).

«Oıyn jáne sporttyq alańdaryn ornatý» baǵdarlamasy aıasynda Oral qalasynda jalpy somasy 379 mln 785 myń teńgege 7 sporttyq jáne oıyn alańdary salyndy.

«Jalpy orta bilim beretin mektepterdi sport jabdyqtarymen qamtamasyz etý» baǵdarlamasy aıasynda oblystaǵy 20 mektep «Bıikterge birge!» baıqaýynyń nátıjesinde jańa sporttyq jabdyqtarmen qamtyldy. Bul maqsatqa 85,698 mln teńge jumsaldy. Sporttyq jabdyq alǵan mektepter: Bókeı ordasy aýdanyndaǵy M.Mámetova atyndaǵy, Bórli aýdany Aqsaı qalasyndaǵy №4, Zelenov aýdanyndaǵy Darııan, Kóshim, Trekın, №1 mektep-lıtseı jáne T.Jarokov atyndaǵy, Terekti aýdanyndaǵy Magıstralnyı, Aqsýat, oblys ortalyǵyndaǵy daryndy balalarǵa arnalǵan mamandandyrylǵan «Bilim-Innovatsııa-Lıtseı» mektep-ınternaty; daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq qazaq mektep-ınternat kesheni jáne Oraldaǵy №3, №6, №17, №20, №26, №32, №36, 43, №44 orta mektepter.

Sondaı-aq «Meniń elim» jobasy aıasynda «Dara» qaıyrymdylyq qorymen birge jalpy somasy 15,5 mln teńgege psıhologııalyq-pedagogıkalyq túzetý kabıneti ashyldy. Bul ortalyqta kómekti qajet etetin kez kelgen erekshe bala nemese onyń ata-anasy joǵary bilikti defektolog, psıholog, logoped, sýrdopedagog, massajıst, tıflopedagog mamandardan keshendi járdem ala alady. Barlyǵy Oral qalasynda erekshe bilim berýdi talap etetin eki myńnan asa bala turady. Olardyń 800-den astamy - múgedekter. 400 bala kásibı mamandardyń kómegine muqtaj. Damýynda aýytqýy bar mektepke deıingi balalardyń 25 paıyzy túzetý kómegimen qamtylmaǵan. Jańa ortalyq bul sandy azaıtýǵa múmkindik beredi. Jyl saıyn ortalyqta damýynda aýytqýy bar 150 balaǵa jáne olardyń ata-analaryna tegin qyzmet kórsetiletin bolady.

«Samuryq-Qazyna» AQ - Qazaqstandaǵy úlken 15 ulttyq kompanııany toptastyrǵan iri holdıng. Holdıngte barlyǵy 340 myń adam eńbek etedi. Holdıngtiń asa mańyzdy strategııalyq jumys baǵyttarynyń biri óziniń qyzmetkerleriniń jaıly ómirin qamtamasyz etý jáne solar turatyn qalalardyń ınfraqurylymyn damytý bolyp tabylady. Bizdiń qor 2016 jyly «Meniń elim» áleýmettik ınvestıtsııalar baǵdarlamasyn bastady. Baǵdarlama holdıngke kiretin iri kompanııalardyń úles salmaǵy basym oblystarda iske asyrylýda. Kúni búgin Qazaqstanda mundaı oblystardyń sany - 9. Batys Qazaqstan oblysynda holdıngtiń 5600 qyzmetkeri (shamamen 8200 otbasy) turyp jatyr», - dedi L.Dıas.

Qala ákimi M.Muqaev óz sózinde áleýmettik jobalardyń aıryqsha mańyzdylyǵyn atap ótti.

«Bıyl qala ákimdiginiń jáne «Samruk-Kazyna Trust» qory qarjylarynyń esebinen 20 kópbeıindi sport nysanynyń qurylysy bastaldy. Olardyń árqaısysy qaıtalanbas erekshelikke ıe. Endigi mindet - osy sport nysandaryn uqypty, durys maqsatta paıdalaný. Biz olardy qalanyń teńgerimine aldyq», - dedi M.Muqaev.

Aıta keteıik, búgin «Samruk-Kazyna Trust» qorynyń ókilderi «Aqyl-oı kemistigi bar balalarǵa arnalǵan oblystyq arnaıy mektep-ınternaty» KMM-da boldy Sondaı-aq balalardyń sporttyq alańy ashylyp, «Bıikterge birge!» baıqaýynda jeńiske jetken mektepterge sertıfıkattar tapsyrý rásimi boldy.