BQO-da 227 dana kıik múıizin satpaq bolǵandar sottaldy
ORAL. QazAqparat – Qaztalov aýdandyq sotynyń úkimimen 227 dana kıik múıizin satpaq bolǵan turǵyndar sottaldy, dep habarlaıdy QazAqparat tilshisi.
Qaztalov aýdandyq polıtsııa bólimi málim etkenindeı, Jánibek aýdany Kúıgenkól aýylynyń turǵyndary Bekbolat Jumaqaev pen Baqytjan Qajyǵalıev QR QK 339-baby 2-bóligi 2-tarmaǵyna sáıkes aıypty dep tanylyp, múlikterin tárkileýsiz, árqaısysy úsh jyl merzimge bas bostandyqtarynan aıyryldy.
Sonymen qatar olar bes jylǵa deıin ańshylyq qyzmetpen aınalysa almaıdy.
Sot talqysynda belgili bolǵanyndaı, atalǵan turǵyndar 2019 jyldyń qarashasy men bıylǵy sáýir aıy aralyǵynda Kúıgenkól men Qaztalov aýdany Tereńkól aýyldyq okrýgi shekarasynda ornalasqan Aşyózek ózeni boıyna birneshe ret baryp, ólip jatqan kıikterdiń múıizin kesken.
Barlyǵy 227 dana múıizdi jınap, Kúıgenkól aýyly mańyndaǵy shuńqyrda jasyryn saqtaǵan. Sodan keıin 22 sáýir kúni kezdesip, aldyn ala sóz baılasyp, múıizderdi qapqa salyp, satý maqsatymen B.Jumaqaev aıdaǵan «Folksvagen Golf-2» avtokóligimen Qaztalov aýdany Qoshankól aýyldyq okrýgine qarasty Qarasý qystaǵyna tasymaldaǵan. Sol jerde polıtsııa qyzmetkerleriniń qolyna túsken.
Sot májilisinde B.Jumaqaev pen B.Qajyǵalıev ózderine taǵylǵan aıypty tolyq moıyndap, qylmys jasaǵandaryna ókinip, qatań jazalamaýdy surady.
Sottalýshylardyń áreketterinde kıikti naqty joıý jáne tabıǵatqa zııan keltirý deregi anyqtalmaǵandyqtan, jábirlenýshi memlekettik mekemeniń 464 mln 967,750 myń teńgeni materıaldyq zalal retinde óndirý týraly azamattyq talaby qanaǵattandyrylmady.
Sot úkimi zańdy kúshine engen joq.
Eske sala keteıik, budan buryn BQO-da turǵyndardyń 227 dana kıik múıizimen ustalǵanyn, Oralda múmkindigi shekteýli balalarǵa kúsh qoldanǵan muǵalimniń sottalǵanyn jazǵan bolatynbyz.
