BQO-da 220 shaǵyn mektep Bilimbook kompıýterlik qurylǵylarymen qamtylmaq
ORAL. QazAqparat - Batys Qazaqstan oblysynda shaǵyn jabdyqtalǵan 220 mektep Bilimbook kompıýterlik qurylǵylarymen qamtylmaq, dep habarlaıdy QazAqparat tilshisi.
BQO ákimdiginen túsken málimetke qaraǵanda, bul aýyl men qala jastarynyń aqparattyq-bilim berý resýrstaryna teń qoljetimdiligin qamtamasyz etý baǵytynda jasalýda.
Oblystaǵy 400-ge jýyq mekteptiń 330-y keń jolaqty ınternetpen qamtylǵan, al qalǵan 30 mektepte ınternet jyldamdyǵy tómen.
Jalpy, óńir bıýdjetiniń 45 paıyzdan astamy bilim salasyn damytýǵa baǵyttalǵan. Ótken jyly 24 jańa bilim berý nysany ashylyp, 17-si jańadan jóndeldi.
Nazarbaev zııatkerlik mektepterimen memorandým negizinde muǵalimderdiń, mektep dırektorlarynyń biliktiligi arttyrylýda. Jańartylǵan baǵdarlama 100 paıyz oqýlyqtarmen qamtamasyz etilgen. Oblystyń 250 mektebi zamanaýı robototehnıka kabınetterimen jasaqtaldy.
Sonymen qatar óńirde IT-mektebin ashý josparlanýda. Kúni búgin mektepter Bilim Land tsıfrlyq bilim berý tuǵyrnamasynyń resýrstaryn belsendi paıdalanýda. Bul tuǵyrnama mektep baǵdarlamasy boıynsha jasalǵan 10 myńǵa jýyq qoldanýshy úshin ınteraktıvti sabaqqa múmkindik týǵyzyp otyr. Muǵalimderge arnalǵan myńdaǵan kórneki qural usynady. Qazaq, aǵylshyn, orys tilderinde onlaın, oflaın rejımderinde jumys isteıdi.
Aıta keteıik, 2018-2020 jyldary QR Aqparat jáne kommýnıkatsııalar mınıstrligimen birlesip, 443 eldi mekenniń 100-den astamyn ınternet jelisine qosý jospary bekitildi. Kúni búgin oblysta 300-ge jýyq eldi mekende ınternet bar.
