BQO-da 22 jastaǵy muǵalim qyz ózine qol saldy
BQO polıtsııa departamentiniń baspasóz qyzmetinen málim etkenindeı, qaıǵyly oqıǵa 17 qańtar kúni Aqjaıyq aýdany Saıqudyq aýylynda boldy.
«Saǵat 08.00-de ózi turǵan úıdiń aýlasyndaǵy saraıda asylyp qalǵan 2001 jylǵy qyzdyń máıiti tabyldy. Marqumnyń denesinde eshqandaı zorlyq-zombylyq belgileri bolǵan joq. Múrde sot-medıtsınalyq saraptamaǵa jiberildi. Atalǵan derek QR QK 105-babyna (ózin-ózi óltirýge deıin jetkizý) sáıkes sotqa deıingi tergep tekserýdiń biryńǵaı tiziliminde tirkeldi. Tergeý amaldary júrgizilip, qylmys quramy bolmaýyna baılanysty is qysqartyldy», dep habarlady vedomstvodan.
Aqjaıyq aýdandyq bilim berý bóliminiń basshysy Erbolat Bekmýldınniń aıtýynsha, marqum Saıqudyq aýylyndaǵy J.Moldaǵalıev atyndaǵy orta mektepte ótken jylǵy qyrkúıekten bastap bastaýysh synyp muǵalimi esebinde jumys istegen. Ózi Bazarsholan aýylynan bolǵandyqtan, Saıqudyqta jaqyn aǵaıynynyń úıinde turǵan.
«Jas maman bolǵandyqtan, oǵan birden tálimger bekitilgen. Mektep dırektory Raıa Zeıneshqyzynyń sózine qaraǵanda, ol aldymen bala kútimimen otyrǵan muǵalimniń ornyna 28,5 saǵatpen júrgen. Keıin ol adam jumysqa shyqqannan keıin 18,5 saǵatpen, ıaǵnı tolyq júktememen qalǵan. Jas maman bolǵannan keıin barynsha qoldaý kórsetilgen. 20 jeltoqsanda aýyryp, soqyrishekten eki ret ota jasalyp, jumysqa 13 qańtar kúni shyqqan. Mektep dırektorynan eki ret páter surap, ótinish aıtqan. Qaıtys bolardan bir kún buryn úıdegi balalarǵa sabaq berýge barǵan da, mektepke kelmegen. Mektep basshylary jaraqatyn aýyrsynyp júrgen bolar dep izdemegen. Muǵalim qyzdyń ne sebepti asylyp qalǵany belgisiz bolyp otyr», dedi QazAqparat tilshisine E.Bekmýldın.