BQO-da 22 bas iri qara malyn urlaǵan aǵaıyndylar ustaldy

ORAL. QazAqparat – Batys Qazaqstan oblysynda 22 bas iri qara maldy urlaǵan aǵaıyndy eki kúdikti ustaldy, dep habarlaıdy QazAqparat tilshisi.

BQO polıtsııa departamentiniń resmı ókili Bolatbek Belgibekovtiń málim etkenindeı, olar Qaratóbe aýdany Tólen aýylynda 2016 jyldan beri osy kezge deıin mal urlyǵymen aınalysqan.

Qazirgi kezde 22 epızodtan turatyn qylmystyq is tergelýde.

Tergeý barysynda aǵaıyndylardyń aýyl turǵyndarynyń jaıylymynda júrgen 22 bas iri qarasyn jasyryn jymqyrǵany, keıbireýin osy kúnge deıin tiri kúıinde saqtap, en tańbasyn ózgertip, óz attaryna menshiktep alǵany anyqtaldy. Osylaısha jábirlenýshilerge 4 mln 860 myń teńge shyǵyn keltirgen.

Іs barysynda kúdiktilerdiń qylmystyq is-áreketinen tapqan aqshasyna satyp alynǵan avtokólik, et tasıtyn tirkeme tárkilendi. Basqa da dáleldemeler alynyp, is qujattaryna tirkeldi.

Urylardyń is-áreketi aldyn ala sóz baılasyp, toptasyp, bótenniń malyn birneshe ret jasyryn jymqyrý retinde saralanyp otyr.

«Іstiń keń kólemdi ári kóp epızodty bolýyna baılanysty qazirgi ýaqytta tergeý amaldary jalǵasýda. Sonyń qorytyndysyna sáıkes aldaǵy ýaqytta QR Qylmystyq protsess júrgizý kodeksi aıasynda protsessýaldyq sheshim qabyldaý úshin sotqa joldanatyn bolady», dedi QazAqparat tilshisine B.Belgibekov.

Eske sala keteıik, budan buryn BQO-da mal urlaýmen aınalysqan aǵaıyndy barymtashylardyń ustalǵanyn, kolledj qarjysyn jymqyrǵan bas esepshiniń sottalǵanyn jazǵan bolatynbyz.