BQO-da 215 medıtsına qyzmetkerine 22,6 mln teńge ústemeaqy tólendi
ORAL. QazAqparat – Batys Qazaqstan oblysynda koronavırýsqa qarsy kúres sharalaryna tikeleı tartylǵan 215 medıtsına qyzmetkerine 22,6 mln teńge ústemeaqy tólendi, dep habarlaıdy QazAqparat tilshisi.
Oblys ákimdigi málim etkenindeı, QR Prezıdenti Qasym-Jomart Toqaevtyń tapsyrmasyna sáıkes aldyńǵy shepte júrgen medıtsına qyzmetkerlerine qoldaý kórsetilýde.
Ústemeaqy úsh top boıynsha tólenetini belgili. Óńirde naýryz aıynyń qorytyndysyna sáıkes birinshi sanat (qaýiptiligi asa joǵary) boıynsha 23, sondaı-aq ekinshi topqa (qaýiptiligi joǵary) kiretin 101 jáne úshinshi sanattaǵy (qaýiptiligi ortasha) 91 qyzmetkerge ústemeaqy tólendi.
Oblystyq densaýlyq saqtaý basqarmasynyń basshysy Bolatbek Kaıýpovtyń aıtýynsha, qazirgideı jaýapty kezeńde medıtsına qyzmetkerleriniń qaýipsizdik sharalaryn saqtaýy da asa mańyzdy.
Eske sala keteıik, budan buryn Oralda medıtsına qyzmetkeriniń koronavırýs juqtyrǵanyn jazǵan bolatynbyz.
Qazaqstanda koronavırýs juqtyrǵan medıtsına qyzmetkerlerine 2 mln teńge tólenetini málim.
«Qazirgi kezde Oralda koronavırýs juqtyryp alǵan medbıkege qatysty epıdemıologııalyq tekserý júrgizilýde. Sonyń qorytyndysyna sáıkes tıisti sheshim qabyldanatyn bolady», - dedi B.Kaıýpov.
