BQO-da 21 jastaǵy stýdentti óltirgen turǵyn 17 jylǵa sottaldy
ORAL. KAZINFORM — BQO qylmystyq ister jónindegi mamandandyrylǵan aýdanaralyq sotynda Qýandyq Haırýllınge qatysty úkim shyqty.

BQO sotynyń baspasóz qyzmetinen málim etkenindeı, oǵan QR QK 99-baby 2-bóligi 8-tarmaǵyna sáıkes adam óltirý faktisi boıynsha aıyp taǵyldy.
Sot talqysynda anyqtalǵanyndaı, oqıǵa 2024 jyly 27 maýsymda saǵat 09.00 shamasynda Báıterek aýdany Mıchýrın aýylynda bolǵan. Sottalýshy buryn qaryzǵa alǵan aqshany qaıtarmaý maqsatynda, paıdakúnemdik nıetpen óziniń dosy Jetkergen Jambylovtyń keýde tusynan birneshe ret pyshaq suǵyp, óltirgen.
— Alqabıler alqasynyń úkimimen Q.Haırýllın asa aýyr qylmysty aýyrlatatyn jaǵdaıda jasaǵany úshin kináli dep tanyldy. Sot zań talaptaryn negizge ala otyryp, oǵan QR QK-niń 99-baby 2-bóligi 8-tarmaǵymen 17 jyl merzimge bas bostandyǵynan aıyrý jazasyn kesti. Jazasyn qaýipsizdigi ortasha qylmystyq-atqarý júıesi mekemesinde óteý belgilendi. Sot úkimi zańdy kúshine engen joq, — dep habarlady vedomstvodan.
Eske sala keteıik, budan buryn Oralda joǵalyp ketken 21 jastaǵy stýdent úsh kúnnen beri izdestirilip jatqanyn jazǵan bolatynbyz.
Sondaı-aq Oralda joǵalyp ketken 21 jastaǵy stýdentti óltirgen kúdikti ustaldy.
Týystary áleýmettik jeli arqyly izdestirgen marqumnyń denesi bir aıdan keıin tabylǵan edi.
Onyń múrdesin sottalýshy saraıda kómip tastaǵan.